काठमाडौँ — भारतको उडिसामा हुने एसियाली टेबलटेनिस टिम च्याम्पियनसिपको २८ औं संस्करणमा नेपालका ६ खेलाडीले प्रतिस्पर्धा गर्ने भएका छन् ।

अक्टोबर ११ देखि १५ सम्म भुवनेश्वरस्थित कलिंगा एथलेटिक्स एचपीसी बिल्डिङमा हुने प्रतियोगितामा ३–३ पुरुष र महिला खेलाडीले भाग लिने छन् ।

पुरुषमा संयोग कपाली, रुविन महर्जन र राजीव चिंकबञ्जार तथा महिलामा नवीता श्रेष्ठ, वियन्का राई र इभाना थापाले प्रतिस्पर्धा गर्ने छन् । टिममा ५ सिंगल खेल हुनेछ ।

टोली प्रमुखमा अखिल नेपाल टेबलटेनिस संघका महासचिव कुवेरप्रकाश सिंह र प्रशिक्षकमा मोहनदास बासुकला छन् । प्रतियोगितामा २२ राष्ट्रको सहभागिता रहने प्रशिक्षक बासुकलाले जनाए ।

नेपालमै गत जुलाईमा विश्व टेबलटेनिस च्याम्पियनसिपका लागि भएको दक्षिण एसियाली क्षेत्रीय टेबलटेनिस छनोट प्रतियोगिताका आधारमा खेलाडी छनोट गरिएको टेबलटेनिस संघले जनाएको छ ।