पाल्पा — प्रथम लालीगुराँस कप राष्ट्रिय यु–१९ राष्ट्रिय फुटबल प्रतियोगिता पाल्पाको रामपुरमा आइतबारदेखि सुरु भएको छ । रामपुरको मटेरीमा सुरु प्रतियोगितामा आयोजक लालीगुराँस एसोसिएशन (रातो) ले विजयी भएको छ । 

रामपुरको ठूलोटार खेलमैदानमा भएको खेलमा लालीगुराँस (रातो) ले युथ युनियन, नवलपुरलाई १–० ले पछि पारेको हो । लालीगुराँसका लागि सोजित रूचालले निर्णायक गोल गरे । खेलमा एलजीका प्रनिल हमाल प्लेयर अफ दि म्याच घोषित भएका छन् ।

रामपुर नगर खेलकुद विकास समितिका अध्यक्ष कमल सेन, आयोजक क्लबका अध्यक्ष मधुसुदन पोखरेलले प्रतियोगिताको उद्घाटन गर्दै खेल क्षेत्रमा रामपुरले पहिचान बनाउने बताए । उनले पोखरेलले नयाँ प्रतिभालाई प्रोत्साहन गर्न प्रतियोगिता सञ्चालन गर्न लागेको बताए ।

यु–१९ ‘लालीगुराँस कप’ सेभेन ‘ए’ साइडको आधारमा खेलाइएको छ । प्रतियोगितामा १८ समूहले भाग लिएका छन् । प्रतियोगिता २५ गतेसम्म सञ्चालन हुने प्रतियोगितामा पहिलो हुनेले २ लाख नगद, ट्रफी, प्रमाणपत्र र मेडल पाउनेछन् ।

प्रतियोगितामा काठमाडौं, पोखरा, बुटवल, चितवन, मकवानपुरसहित विभिन्न जिल्लाका १५ समूहका साथै आयोजक टिममार्फत् रामपुर नगरक्षेत्र भित्रका तीन समूहले भाग लिएको खेल संयोजक आदेश रानाले बताए ।

प्रतियोगितामा उपविजेताले १ लाख रूपैयाँ नगदसहित सिल्ड, मेडल र प्रमाण–पत्र पाउनेछन् । सेमिफाइनल पुग्ने समूहलाई २५ हजार रूपैयाँ नगद साथै ट्रफी प्रदान गरिने आयोजकले जनाएको छ ।