पाल्पा — पाल्पाको रामपुरमा हुने वाइवाइ तेस्रो ज्योतिपुञ्ज कप खुला फुटबल प्रतियोगितामा ‘ए’ डिभिजन क्लबसहित १० टिमले प्रतिस्पर्धा गर्ने भएका छन् ।

ए डिभिजन क्लब हिमालयन शेर्पाले सहभागिता जनाउने आयोजक ज्योतिपुञ्ज युवा क्लब रामपुरका अध्यक्ष सुन्दर रानाले जानकारी गराए ।

उनका अनुसार असोज २६ देखि कात्तिक ३ सम्म हुने प्रतियोगितामा आयोजक ज्योतिपुञ्ज युवा क्लब, तानसेनको न्यु युथ युनियन क्लब, रूपन्देहीको देवदह ब्वाइज, पोखराको एलजी एसोसिएसन, स्याङ्गजाको होराइजन क्लब वालिङ, नवलपुरको भैरव स्पोर्ट्स क्लब, युनाइटेड युथ क्लब र अभिषेक चर्च रजहर, चितवनको सूर्यपुर फुटबल क्लबको सहभागिता हुनेछ । 

प्रतियोगिता सम्पन्न गर्न मैदान सरसफाइ गरिनुका साथै अस्थायी प्यारापिट निर्माण सुरु गरिएको छ । रामपुरमा रंगशाला निर्माण गर्ने अभियानसहित रामपुर नगरपालिका–७, किसानबारीस्थित मैदानमा प्रतियोगिता गर्न लागेको आयोजकले जनाएको छ ।