पोखरा — दोस्रो पुम्दी–भुम्दी पर्वतीय दौड प्रतियोगितामा सुदूरपश्चिमका नरेन्द्रसिंह रावतले उपाधि जितेका छन् । उनले ८ किलोमिटर दूरी ३५ मिनेट ४४ सेकेन्डमा पूरा गर्दै ५० हजार रुपैयाँ प्राप्त गरे ।

पोखरामा शनिबार भएको प्रतियोगितामा सुदूरपश्चिमकै करन रावल दोस्रो बने भने कर्णालीका दलबहादुर कुँवर तेस्रो भए । करनले ३६ मिनेट ३३ सेकेन्ड र दलबहादुरले ३७ मिनेट १६ सेकेन्डमा दूरी पार गरेका थिए । उनीहरूले क्रमश: ३० हजार र १५ हजार रुपैयाँ प्राप्त गरे ।

गौतम श्रेष्ठ चौंथो हुँदै ७ हजार, सफल लामा पाँचौं भई ३ हजार रुपैयाँ पाए । छैटौंदेखि दसौंसम्म पञ्चराम बुढा, बुद्धिराम गुरुङ, जोगेन्द्र बुढा, तेञ्जोन रोका मगर र इमोन गुरुङले जनही एक हजार रुपैयाँ पाए । विदेशी पर्यटकतर्फ फ्रान्सका थियो डनेटले ४९ मिनेट ५१ सेकेन्डमा दूरी पार गर्दै विजेता भए । भेट्रान्सतर्फ गण्डकीका किशोर थापा पहिलो बने । दुवैले जनही १५ हजार रुपैयाँ प्राप्त गरे ।

वडा २२ स्तरतर्फ कुशल परियार पहिलो र सुज्जल परियार दोस्रो भए । उनीहरूले क्रमश: ४९:१५ र ५१:०३ मिनेटमा दूरी पूरा गरे । महिलातर्फ कोशीकी पदमकुमारी सुनुवारले ५३:३९ मिनेटमा दूरी पूरा गरी पहिलो हुँदा बागमतीकी नीतु तामाङले ५७ मिनेट ४६ सेकेन्डमा पार गर्दै दोस्रो भइन् । वडा र महिलातर्फ पहिलो र दोस्रोले जनही १५ हजार र ७ हजार रुपैयाँ जिते । यू–१६ मा प्रकाश थिङ (४२:५८) पहिलो हुँदा तीलबहादुर परियार (३८) दोस्रो भए भने कमल पौडेल (४९:५६) तेस्रो स्थान प्राप्त गर्न सफल भए । उनीहरू सबै गण्डकीका हुन् । पहिलो, दोस्रो र तेस्रोले जनही १५ हजार, ७ हजार र ३ हजार जिते । प्रतियोगितामा ८२ वर्षका पुम्दी–भुम्दीका लीलबहादुर गुरुङलाई सिनियरतर्फ र ११ वर्षका आरोन नेपाललाई जुनियरतर्फ पुरस्कृत गरियो ।