एथलेटिक्स संघका अध्यक्ष राजीवविक्रम शाहसहित तीन सदस्यीय टोली मंगलबार जापान प्रस्थान गर्दैछन्, जहाँ मुकेशको राष्ट्रिय कीर्तिमानमा ध्यान केन्द्रित हुनेछ।
काठमाडौँ — जापानको टोकियोमा हुने २० औं विश्व एथलेटिक्स च्याम्पियनसिपमा मुकेश पालले प्रतिस्पर्धा गर्ने भएका छन् । सेप्टेम्बर १३ देखि २१ सम्म हुने प्रतियोगितामा मुकेशले १५ सय मिटर दौडमा भाग लिने छन् ।
यस स्पर्धामा मुकेशको नाममा ३ मिनेट ४९ सेकेन्डको राष्ट्रिय कीर्तिमान रहेको छ । उनीसँगै नेपाल एथलेटिक्स संघका सचिव आरके विष्ट अफिसियलका रूपमा जापान जाने छन् ।
सेप्टेम्बर १० देखि १३ सम्म जापानमै हुने विश्व कंग्रेसमा एथलेटिक्स संघका अध्यक्ष राजीवविक्रम शाहले सहभागिता जनाउने छन् । ३ सदस्यीय टोली मंगलबार जापान जाने कार्यक्रम छ ।
टोलीलाई राष्ट्रिय खेलकुद परिषद् (राखेप) का उपाध्यक्ष ध्रुव आचार्य र राखेप सदस्य सुवर्ण श्रेष्ठले सोमबार बिदाइ गरे ।
