काठमाडौँ — सेन्ट जेभियर्स कलेजले ग्लोबल रिचको सातौं वार्षिकोत्सवको अवसरमा आयोजित अन्तर विद्यालय ए लेभल फुटसल प्रतियोगिता जितेको छ । धुकु फुटसलमा शनिबार सम्पन्न प्रतियोगिताको फाइनलमा सेन्ट जेभियर्सले प्रिमियर इन्टरनेशनल आईबी कन्टिन्युम स्कूललाई पेनाल्टी शुटआउटमा ४–३ गोल अन्तरले पराजित गर्‍यो । 

निर्धारित ४० मिनेटको खेल १–१ गोलको बराबरीमा सकिएपछि निर्णय टाइब्रेकरबाट लिइएको थियो । प्रतियोगितामा उपत्यकाका १६ कलेजको सहभागिता थियो । ग्लोबल रिचले आफ्नो सामाजिक उत्तरदायित्वअन्तर्गत यो प्रतियोगिता आयोजना गरेको हो । 

प्रतियोगिताको उत्कृष्ट खेलाडी विजेता सेन्ट जेभियर्सका आदित्य गैरे भए । सर्वाधिक गोलकर्ता प्रिमियमका श्यामिर श्रेष्ठ, उत्कृष्ट गोलरक्षक प्रिमियमकै रिलिश न्यौपाने र सर्वोत्कृष्ट प्रशिक्षक सेन्ट जेभियर्स्का वेदान्त सिंह ठकुरी भए । प्लेयर अफ द फाइनल सेन्ट जेभियर्सका सन्जोग राई भए । रातो बंगला स्कूलले फेयर प्ले अवार्ड जित्यो ।