काठमाडौँ — बूढानीलकण्ठ नगरपालिका वडा–८ स्थित गोल्फुटारमा गोल्फुटार सेमी इन्डोर बास्केटबल हलको शनिबार उद्घाटन गरिएको छ ।

बूढानीलकण्ठ नगरपालिका मेयर मीठाराम अधिकारीले हलको उद्घाटन गरे । करिब २ रोपनी क्षेत्रफल हातामा निर्मित हलका लागि २ करोड बजेट विनियोजन गरिएकामा १ करोड ४४ लाखमा निर्माण सम्पन्न भएको नगरपालिकाले जनाएको छ ।

कोर्टमा सावर, बाथरुम, कमन रुम, चेन्जिङ रुम, शौचालय र करिब १ सय दर्शक क्षमताको प्यारापिट बनाइएको छ । हलसँगै रहेको खाली जमिनमा पनि फुटसल पूर्वाधारको निर्माण गरिँदै छ ।

मेयर अधिकारीले नगर गौरवको योजनाअन्तर्गत हल निर्माण गरिएको बताए । उनले यसबाट कुनै पनि समय प्रशिक्षण र प्रतियोगिता सञ्चालन गर्न सहज हुने अपेक्षा गरे ।

उपमेयर अनिता लामाले बूढानीलकण्ठ थुप्रै राष्ट्रिय खेलाडी भएको नगरपालिका भएको स्मरण गराउँदै खेलाडीले सुविधासम्पन्न पूर्वाधारमा प्रशिक्षण गर्न सकुन् भन्ने उद्देश्यले नगरपालिकाले खेलकुद गतिविधिसँगै पूर्वाधार निर्माणमा विशेष दिएको बताइन् ।

नगरवासी राष्ट्रिय महिला बास्केटबल टोलीकी कप्तान अनुशा मल्लले खेल पूर्वाधारले पनि बालबालिकालाई खेलप्रति आकर्षित गर्ने धारणा व्यक्त गर्दै आफूले सानैदेखि खेल्दै आएको आउटडोर कोर्टले हलको स्वरुप पाएकोमा खुसी व्यक्त गरिन् ।