अम्मानमा भएको आईजेएफ कन्टिनेन्टल रेफ्री परीक्षामा सफल हुँदै कविता एसियाली स्तरको जुडो निर्णायक बन्ने दोस्रो नेपाली महिला बनिन्।
काठमाडौँ — नेपाल जुडो संघ अन्तर्गतको रेफ्रिङ कमिसनले कविता पुनलाई सोमबार सम्मान गरेको छ । कवितालाई आईजेएफ कन्टिनेन्टल रेफ्री परीक्षा उत्तीर्ण गरेकामा सम्मान गरिएको हो ।
परीक्षा जोर्डनको अम्मानमा अगस्ट १५ देखि १९ सम्म भएको थियो । यो उपलब्धिसँगै कविता एसियाली स्तरसम्मको जुडो प्रतियोगितामा निर्णायकको भूमिका निर्वाह गर्न योग्य भएकी छन् । नेपालबाट यो उपलब्धि हासिल गर्ने कविता दोस्रो महिला तथा समग्र १३ औं निर्णायक हुन् ।
आईजेएफ कन्टिनेन्टल रेफ्री एक्जामिनेसन तथा सेमिनारका क्रममा भएको परीक्षामा नेपालबाट राधादेवी राई र रवि चौधरीले सहभागिता जनाएकामा कवितामात्र सफल भएकी हुन् ।
कवितालाई जुडो महासंघका अध्यक्ष दीपकहर्ष वज्राचार्य र कमिसनका अध्यक्ष धर्मकुमार श्रेष्ठले प्रशंसापत्रसहित सम्मान गरे ।
