काठमाडौँ — नेपालले साफ यू–१७ महिला च्याम्पियनसिपमा बुधबार खराब सुरुआत लिएको छ । यो यति बिर्सनलायक हार रह्यो कि यसले प्रतियोगिताका बाँकी खेलसमेत प्रभावित पार्न सक्नेछ । 

भुटानको थिम्पुस्थित चाङलिमाथाङ रंगशालामा भएको प्रतियोगिताको पहिलो खेलमा भारतले नेपाललाई ७–० ले पराजित गरेको हो । भारतको जितमा अभीष्ट बस्नेत, नीरा चानु र अनुष्का कुमारीले समान दुई गोल गरे ।

जुलन नोन्गमाइथिमले एक गोल गरिन् । भारत पहिलो हाफमा ५ गोलले अगाडि थियो । खेलको सुरुमै नेपालले केही आकर्षक खेल प्रदर्शन गरे पनि त्यसपछि भारतले नियमित अन्तरमा गोल गरेको हो । 

नेपालको सबैभन्दा कमजोर प्रदर्शन पहिलो हाफमै रह्यो । अभीष्टले १४ औं मिनेटमा पहिलो गोल गरिन् । त्यसपछि २३ औं मिनेटमा नीराले दोस्रो गोल गरिन् । अनुष्काले ३३ औं मिनेटमा तेस्रो गोल थपिन् । पहिलो हाफ सकिन चार मिनेटअघि अभीष्टले व्यक्तिगत दोस्रो गोल गरिन् । 

अझ पहिलो हाफको इन्ज्युरी समयमा जुलनले पाँचौं गोल गरेकी हुन् । दोस्रो हाफमा नीराले र अनुष्काले एक–एक गोल गरेका थिए । खेलपछि नेपाली टोलीका प्रशिक्षक चेतनारायण श्रेष्ठले हारमा निराशा पोखे । उनले भने, ‘सुरुको १०–१५ मिनेट हाम्रो प्रदर्शन ठीकै रह्यो । सुरुमै पाएका केही अवसरको फाइदा लिन सकेनौं । त्यसमा गोल गरेको भए हामी अगाडि हुन सक्थ्यौं ।’