बुधबार उच्च अदालतका न्यायाशीध जगतबहादुर थापा र तेजेन्द्रप्रसाद शर्मा सापकोटाको संयुक्त इजलासले गुरुङको पक्षमा उत्प्रेषण परमादेश दिन अस्वीकार गर्दै रिट खारेज गरिदिएको छ । यससँगै लुम्बिनी प्रदेश क्रिकेट संघको विशेष साधारणसभाले गुरुङलाई पदमुक्त गर्न गरेको निर्णय वैध ठहरिएको छ । यस्तै, संघले अध्यक्ष चयनका लागि अर्को साधारणसभा बोलाउने बाटो समेत खुलेको छ । 

गुरुङ पछिल्लो डेढ वर्षयता संघको प्रदेश अध्यक्ष थिए । लुम्बिनी प्रदेश क्रिकेट संघका कार्यवाहक अध्यक्ष विनय राजभण्डारीले विशेष साधारणसभाले गरेको निर्णय अदालतले समेत वैध भनेकाले अब छिट्टै वार्षिक साधारणसभा गर्ने बताए ।

गुरुङ पदमुक्त भए पछि संघमा अध्यक्ष पद खाली भएको छ । यस्तै, कोषाध्यक्ष राजेश शाक्यको मृत्यु भएपछि उक्त पद पनि खाली छ । अबको वार्षिक साधारणसभाले यी पदमा नियुक्ति गर्ने संघले जनाएको छ । गुरुङले मनपरी संघ चलाएको, आर्थिक अनियमितता गरेको र विधानलाई बेवास्ता गरी अघि बढेको भन्दै उनीविरुद्ध सम्पूर्ण कार्यसमितिले अविश्वास प्रस्ताव पारित गरेको थियो ।