लन्डन — आर्सनलले आइतबार स्पेनिस मिडफिल्डर मार्टिन जुबिमेन्डीलाई रियल सोसिडाडबाट अनुबन्धित गरेको जनाएको छ । उनको सरुवा रकम ७ करोड ५० लाख डलर भएको बताइएको छ । स्पेनबाट युरो २०२४ को उपाधि जितेका जुबिमेन्डीलाई यसअघि लिभरपुल र रियल म्याड्रिडले पनि लिन तत्परता देखाइरहेका थिए ।

‘यो मेरो खेल जीवनका लागि निकै ठूलो क्षण हो,’ डिफेन्सिभ मिडफिल्डर जुबिमेन्डीले भने । उनले आर्सनलसँग पाँचवर्षे सम्झौतामा हस्ताक्षर गरेको जनाइएको छ । रियल सोसिडाडले उनका लागि तोकेको रकमभन्दा बढीमा आर्सनलले जुबिमेन्डीलाई लिएको एथ्लेटिकले जनाएको छ । जसअनुसार विभिन्न किस्तामा उनको सरुवा रकम आर्सनलले बुझाउनेछ । 

‘यो यस्तो क्षण हो, जुन मैले प्रतीक्षा गरिरहेको थिएँ, जसलाई पूरा गर्न चाहन्थें । यो कति ठूलो क्लब हो भन्ने यहाँ खुट्टा टेकेपछि मात्र थाहा हुन्छ । आर्सनल नै मैले रोज्नुको कारणचाहिँ उनीहरू जसरी खेल्छन्, त्यो मेरो खेललाई सुहाउँदो छ । उनीहरूले पनि हालै आफ्नो क्षमता देखाइसकेका छन् । राम्रो नतिजा अझै आउन बाँकी छ ।’