काठमाडौँ — विश्व टेनिसको प्रतिष्ठित प्रतियोगिता विम्बल्डनको नेपाली च्यानल कान्तिपुर म्याक्सले प्रत्यक्ष प्रसारण गर्ने भएको छ । ठूला अन्तर्राष्ट्रिय खेलकुद प्रतियोगिताहरू सबै नेपालीको घर–घरसम्म पुर्‍याउने क्रममा एउटा ऐतिहासिक उपलब्धिका रूपमा विम्बल्डन टेनिसको प्रत्यक्ष प्रसारणलाई लिएको कान्तिपुर टेलिभिजनका सीओओ सुरजसिंह ठकुरीले बताए ।

दरबारमार्गस्थित हार्डरक क्याफेमा बिहीबार पत्रकार सम्मेलन गर्दै कान्तिपुर टेलिभिजनले विम्बल्डनको प्रत्यक्ष प्रसारणबारे जानकारी दिएको हो । 

कान्तिपुर म्याक्सले भर्खरै सम्पन्न विश्व क्रिकेटको प्रभावशाली फ्रेन्चाइज लिग आईपीएलको प्रत्यक्ष प्रसारण गरेको थियो । विम्बल्डन टेनिस इंग्ल्यान्डको लन्डनमा यही जुन ३० देखि जुलाई १३ सम्म आयोजना हुनेछ । चार ग्रान्ड स्लाममध्ये सबैभन्दा प्रतिष्ठित प्रतियोगिता हो विम्बल्डन । 

अस्ट्रेलियन र फ्रेन्च ओपनपछि तेस्रो ग्रान्ड स्लामका रूपमा हुने विम्बल्डनको इतिहास आफैंमा समृद्ध छ । सन् १८७७ देखि सुरु विम्बल्डन १ सय ४८ वर्ष लामो इतिहास बोकेको प्रतियोगिता हो । यो घाँसे कोर्टमा आयोजना हुने गर्दछ । विश्व खेलकुदमा लोकप्रिय र ठूलो धनराशिको पुरस्कार रहने खेलमा पर्दछ टेनिस । नेपालमा पनि टेनिसको इतिहास पुरानै छ । नेपाल टेनिस संघ स्थापना भएको नै ६ दशक बढी भइसक्यो । तर, अपेक्षाकृत यसले फड्को मार्न सकिरहेको छैन । 

त्यही परिप्रेक्ष्यमा कान्तिपुर म्याक्सको पहल विम्बल्डनको प्रत्यक्ष प्रसारण गरेर दूरदराजका नेपाली खेलप्रेमीमाझ टेनिसलाई फैलाउने प्रयास रहेको सीओओ ठकुरी बताउँछन् । कान्तिपुर म्याक्सले पछिल्लो समय खेलकुद केन्द्रित टेलिभिजन च्यानलका रूपमा आफूलाई स्थापित गरिरहेको छ । पछिल्लो एक वर्षमा खेलकुदका थुप्रै राष्ट्रिय र अन्तर्राष्ट्रिय प्रतियोगिताको प्रत्यक्ष प्रसारण गरेको छ ।

‘एकातर्फ खेलकुदका राष्ट्रिय प्रतियोगितालाई पनि उत्तिकै महत्त्व दिएका छौं भने अर्कोतर्फ अन्तर्राष्ट्रिय प्रतियोगिताको लोकप्रियता र ब्यापकता पनि बिर्सेका छैनौं । हाम्रो उद्देश्य राष्ट्रिय र अन्तर्राष्ट्रिय प्रतियोगितालाई सन्तुलित रूपमा अगाडि बढाउने नै हो,’ विज्ञप्तिमा भनिएको छ । 

दुई साता लामो प्रत्यक्ष प्रसारणका क्रममा खेल सुरु हुनुअघि त्यसबारे विश्लेषण कार्यक्रम राखिने र त्यसमा नेपाली टेनिसका पुराना, नयाँ खेलाडीसहित टेनिससँग आबद्ध व्यक्तिहरूसँग कुराकानी गरिने जनाइएको छ ।

नेपालका शीर्षस्थ टेनिस खेलाडीहरूले नेपाली टेलिभिजन च्यानलबाट विम्बल्डनको प्रत्यक्ष प्रसारण हुनुलाई ठूलो उपलब्धिको रूपमा बताए । पुरुष वरीयताका नम्बर एक खेलाडी प्रदीप खड्काले भने, ‘नेपाली टिभी च्यानलमा विम्बल्डन π यो हाम्रा लागि ठूलो कुरा हो, त्यसका लागि कान्तिपुर म्याक्स र प्रत्यक्ष प्रसारण ल्याउन मिहिनेत गर्नुहुने कान्तिपुर परिवारलाई धन्यवाद भन्न चाहन्छु ।’