काठमाडौँ — हाइसेन्स नेपाल प्रथम सायम अन्तरकलेज सेभेन ए साइड फुटसल प्रतियोगितामा २८ छात्र टिमले भाग लिने भएको छ ।
बुधबार सुरु हुने प्रतियोगिताको तयारी पूरा भएको सायम कलेजका प्रिन्सिपल अशोकराज पाण्डेले बताए । पहिलो संस्करणमा २८ टिमको सहभागिता निश्चित भएको बताए ।
सहभागी टिमलाई ८ समूहमा विभाजन गरी लिगकम नकआउट आधारमा खेलाइने छ । हाइसेन्स मुख्य प्रायोजक रहेको प्रतियोगितामा स्नातक तह सेमेस्टर प्रणालीका कलेजका टिम सहभागी हुनेछन् ।
विजेताले ९० हजार, दोस्रोले ४० हजार र तेस्रोले २० हजार रुपैयाँ पुरस्कार प्राप्त गर्नेछन् । उत्कृष्ट खेलाडीले ५ हजार तथा विधागत उत्कृष्टले जनही ३ हजारसहित गिफ्ट भौचर प्राप्त गर्नेछन् । उत्कृष्ट प्रशिक्षकले ट्रफीसहित गिफ्ट भौचर पाउनेछन् ।
प्रतियोगिता आयोजना गर्न करिब ५ लाख ५० हजार खर्च हुने सायमका भाइस प्रिन्सिपल विशाल श्रेष्ठले बताए । तीनदिने प्रतियोगिताका खेल भक्तपुरको रोयल नेपाल फुटसलमा हुनेछ ।
सायम प्रिमियर लिग इन्ट्रा कलेज क्रिकेटको पाँचौं संस्करण सफलतापूर्वक आयोजना गरिसकेको सायमले पहिलो पटक फुटसल गर्न लागेको प्रतियोगिता संयोजक दशरथ शाहीले बताए ।
