मकवानपुर — हेटौंडामा शनिबार सुरु राष्ट्रिय नेकोस कप महिला भलिबल प्रतियोगितामा पहिलो दिन टिपटप न्यु डायमन्ड स्पोर्ट्स क्लब र नेपाल पुलिस क्लब विजयी भएका छन् ।

न्यु डायमन्डले एपीएफ क्लबलाई सोझो सेटमा पराजित गरेको थियो । डायमन्ड २७–२५, २५–१५, २५–१७ को सेटमा विजयी भएको हो । पुलिस क्लबले बागमती प्रदेश टिमलाई सोझो सेटमा २५–१, २५–४, २५–८ ले सहजै पराजित गरेको थियो । 

हेटौंडा–४ हुप्रचौरस्थित भलिबल कोर्टमा जारी प्रतियोगिताको उद्घाटन हेटौंडा उपमहानगरपालिकाकी मेयर मीना लामाले गरेकी थिइन् । प्रतियोगितामा पुलिस, एपीएफ, न्यु डायमन्ड, बागमतीसहित मधेश र गण्डकी प्रदेश गरी ६ टोलीको सहभागिता रहेको छ । विजेताले ५ लाख, उपविजेताले ३ लाख, तेस्रोले १ लाख र चौथो हुने टिमले ५१ हजार रुपैयाँ पुरस्कार प्राप्त गर्नेछन् ।