मकवानपुर — हेटौंडामा फुटबलको रेफ्री प्रशिक्षण सुरु भएको छ । बागमती प्रदेश खेलकुद विकास परिषद्को आयोजनामा शुक्रबारबाट फुटबल रेफ्री प्रशिक्षण सुरु भएको हो । प्रशिक्षणमा ४१ जनाको सहभागिता रहेको छ ।

बागमती प्रदेश खेलकुद विकास परिषदका सदस्य एवम् कार्यक्रम संयोजक अमृत लुङ्बाको अध्यक्षतामा भएको तालिमको उद्घाटनमा हेटौंडा उपमहानगरपालिकाका मेयर मीनाकुमारी लामाको प्रमुख आतिथ्यता रहेको थियो । मेयर लामाले फुटबलसहित सबै खेलको पूर्वाधार र प्रतियोगिताका लागि उपमहानगरपालिकाले सहयोग गर्दै आएको जानकारी दिँदै आगामी दिनमा पनि सहयोग जारी रहने बताइन् ।

उनले रेफ्रीको भूमिकामा व्यवसायिक रुपमा अघि बढ्नका लागि यस प्रशिक्षण फलदायी हुने विश्वास व्यक्त गरिन् । प्रशिक्षणमा प्रशिक्षकहरु सचिन अमात्य, रोजिन श्रेष्ठ, वीरेन्द्र पाण्डे र कल्पना शर्माले सहजीकरण गर्नेछन् । कोर्समा फिटनेस परीक्षण, प्रयोगात्मक र लिखित परीक्षा हुनेछ । बागमती प्रदेश खेलकुद विकास परिषद्का सदस्य एवम् तालिम संयोजक अमृत लुङ्बाले कोर्षपछि फुटबल रेफ्री थप उत्पादन हुने विश्वास व्यक्त गरे । कोर्सपछि आधिकारिक फुटबल खेलाउन योग्य हुने भन्दै उनले सहभागी सबैलाई उतीर्ण हुने गरि लाग्न आग्रह गरे ।