ग्लास्गो, स्कटल्यान्ड — तीब्र बलर नन्दन यादवले तीनदेशीय ट्वान्टी–२० शृंखलाको बाँकी सबै खेल गुमाउने भएका छन् । स्कटल्यान्डको ग्लास्गोस्थित टिटउड क्रिकेट मैदानमा सोमबार नेदरल्यान्ड्ससँग खेलेको अन्तिम ओभरमा आफै बलिङमा रहेको समयमा थ्रो बल नियन्त्रणमा लिँदा उनी घाइते भएका थिए ।

नेदरल्यान्ड्स इनिङ्सको दोस्रो अन्तिम बलमा उनलाई दाहिने हातको बुढी औंलामा चोट लागेको थियो । जसका कारण उनले अन्तिम बल फाल्न सकेका थिएनन् । करण केसीले उक्त अन्तिम बल फालेर नेपाली बलिङ इनिङ्स पूरा गरेका थिए ।

घाइते अवस्थामै नन्दनले निर्णायक क्षणमा ब्याटिङमा आई २ चौकासहित अविजित १२ रन बनाएर नेपाललाई नेदरल्यान्ड्सको स्कोरसँगै बराबरीमा ल्याएका थिए । नेपाललाई अन्तिम बलमा विजयका लागि ५ रन चाहिने अवस्थामा नन्दनले चौका प्रहार गरेपछि स्कोर बराबर भई सुपरओभरमा पुगेको थियो । तीन सुपर ओभरको अविश्वसनीय खेलमा नेदरल्यान्ड्सले नेपाललाई पराजित गरेको थियो ।