ग्लास्गो, स्कटल्यान्ड — एक वर्षअघि नेपाली क्रिकेट टोली आजकै दिन वेस्ट इन्डिजको सेन्ट भिन्सेन्टमा बंगलादेशविरुद्ध ट्वान्टी–२० विश्वकपमा खेलिरहेको थियो । नेपाल लगातार दोस्रो र समग्रमा तेस्रो पटक ट्वान्टी–२० विश्वकपमा पुग्ने आसमा छ । यसैको तयारी नेपालले स्कटल्यान्डमा तीनदेशीय ट्वान्टी–२० शृंखला खेलेर गर्दै छ ।

आइतबार सुरु प्रतियोगिताको पहिलो खेलमा नेदरल्यान्ड्स र स्कटल्यान्डले प्रतिस्पर्धा गरेका थिए । नेपालले सोमबार नेदरल्यान्ड्सविरुद्ध खेलेर प्रतियोगिता सुरु गर्नेछ । तीन टोलीले डबल राउन्ड रोबिनमा एकअर्कासँग प्रतिस्पर्धा गर्नेछन् र सर्वाधिक अंक बटुल्ने टोली विजेता बन्ने छ । 

अक्टोबर ८ देखि १७ सम्म ओमानमा एसिया–इस्ट एसिया प्यासिफिक क्षेत्रको विश्वकप छनोट हुँदै छ । नेपालसहित, ओमान, यूएई, जापान, कुवेत, मलेसिया, पपुवा न्युगिनी, कतार, समाओले यस छनोटमा प्रतिस्पर्धा गर्नेछ र शीर्ष तीन टोली अर्को वर्ष भारत र श्रीलंकामा हुने ट्वान्टी–२० विश्वकपमा छनोट हुनेछ ।

ओमानको ट्वान्टी–२० विश्वकप छनोटको तयारीका लागि नेपालको यात्रा ग्लास्गोको टिटउड क्रिकेट मैदानबाट सुरु हुनेछ । हाल स्वदेशमा मनसुन रहेको अवस्थामा नेपालको प्रमुख तयारी विदेशमा हुनेछ ।

नेपाली टोली स्कटल्यान्डबाट स्वदेश फर्किएको केही समयपछि अस्ट्रेलिया गएर त्यहाँको प्रान्तीय टोलीसँग खेल्ने सम्भावना पनि छ । त्यसबाहेक नेपालले सेप्टेम्बर २७, २८, ३० मा यूएईको शारजहाँमा वेस्ट इन्डिजविरुद्ध तीन ट्वान्टी–२० अन्तराष्ट्रिय शृंखला खेल्ने छ र यहींबाट नेपाली टोली एक सातापछि सुरु हुने ट्वान्टी–२० विश्वकप छनोट खेल्न ओमान पुग्ने छ । 

अघिल्लो साता विश्वकप क्रिकेट लिग–२ मा उच्च प्रदर्शन गरेको नेपाली टोली डन्डीबाट ग्लास्गो आइपुगेको छ । डन्डीमा सनसनी नतिजा निकाल्नेक्रममा नेपालले नेदरल्यान्ड्सविरुद्धको दुवै खेलमा ५ विकेट र १६ रनको नतिजा निकालेको थियो । स्कटल्यान्डसँग भने नेपाल १ खेलमा विजय र अर्कोमा पराजय भोगेको थियो । 

डन्डीमा लिग २ को पहिलो ३ खेल खेलेपछि चोट बोकेका सोमपाल कामी र गुलशन झा नेपाल फर्किसकेका छन् । यसअघि नै नेपालको ट्वान्टी–२० टोलीमा समावेश गरिएका लोकेश बम, किरण ठगुन्ना र रुपेश सिंह ग्लास्गो आइसकेका छन् । अलराउन्डर किरण अघिल्लो महिना वैकल्पिक खेलाडीको रूपमा हङकङ पुगे पनि खेल्न पाएका थिएनन् । तर नेपाली टोलीका प्रमुख अलराउन्डर सोमपाल र गुलशन नै टोलीबाट बाहिरिसकेको अवस्थामा किरणले ‘डेब्यु’ गर्ने सम्भावना बलियो छ । 

ओपनिङ ब्याटर लोकेशले प्लेयिङ ११ मा खेल्न कुशल भुर्तेल, आसिफ शेख र अनिल साहसँग प्रतिस्पर्धा गर्नुपर्ने हुन्छ । गत वर्ष कीर्तिपुरमा आयरल्यान्ड ‘ए’ विरुद्ध खेलेर लिस्ट ‘ए’ को यात्रा सुरु गरेका ब्याटिङ अलराउन्डर रुपेशले ट्वान्टी–२० अन्तराष्ट्रियमा ‘डेब्यु’ गर्न बाँकी छ । 

लिग २ को अन्तिम खेलमा नेदरल्यान्ड्सविरुद्ध डन्डीमा नन्दन यादवले एकदिवसीय अन्तर्राष्ट्रियमा स्मरणीय ‘डेब्यु’ गरेका थिए । उनले नै करण केसीसँग ट्वान्टी–२० अन्तर्राष्ट्रियमा नेपालको बलिङ मोर्चा सम्हाल्ने छन् । लिग २ मा निराशाजनक प्रदर्शन गरेको नेदरल्यान्ड्सको टोलीमा पनि केही खेलाडी परिवर्तन गरिएको छ । देव्रेहाते अलराउन्डरद्वय डेनियल डोरम र बेन फ्लेचर तथा लेगब्रेक बलर सकिब जुल्फिकरलाई टोलीमा थपिएको छ ।