लन्डन — जर्मनीकी छनोट खेलाडी तात्जाना मारियाले आफ्नो करियरको सबैभन्दा ठूलो उपाधिको रूपमा क्विन्स क्लबमा विम्बल्डन वार्मअप प्रतियोगिता जितेपछि ‘क्विन्स अफ क्विन्स’ घोषित भइन् ।

दुई सन्तानकी आमा ३७ वर्षीयाले लन्डनमा भएको क्लिन्स क्लब ग्रासकोर्ट टेनिस च्याम्पियनसिप फाइनलमा आठौं वरीयताप्राप्त अमेरिकी अमान्दा एनिसिमोभालाई ६–३, ६–४ ले हराएकी थिइन् । ८६ औं वरीयताप्राप्त मारियाले आफ्ना छोरीहरू चार्लोट र सेसिलियासहित पति तथा प्रशिक्षक चार्ल्स–एडुवार्ड मारियाको अगाडि उपाधि जितिन् ।

‘यो उपाधि जितको अर्थ मेरा लागि धेरै छ,’ मारियाले भनिन्, ‘यो उमेरमा पनि तपाईं अझै पनि ठूला ट्रफी जित्न सक्नुहुन्छ भन्ने राम्रो उदाहरण बन्न सकेकी छु, यसमा आफैंमा धेरै गर्व छ ।’

आफ्नो चौथो डब्लूटीए उपाधि जित्ने क्रममा उनले शीर्ष २० औं वरीयताभित्रका क्यारोलिना मुचोभा, एलेना रेब्किना र म्याडिसन किजसहित हराएकी थिइन् । २०२० पछि उनी डब्लूटीए टुरमा सबैभन्दा जेठी एकल च्याम्पियन भइन् । त्यतिबेला सेरेना विलियम्सले ३८ वर्षको उमेरमा अकल्यान्ड क्लासिक जितेकी थिइन् ।