काठमाडौँ — सर्वाधिक पुरस्कार राशिको प्रतियोगिता सूर्य नेपाल प्रिमियर गल्फ च्याम्पियनसिप सोमबार गोकर्ण गल्फ क्लबमा सुरु हुनेछ ।

असार ५ सम्म चल्ने प्रतियोगिता ७२ होलको हुनेछ । ३६ होलपछि कट लागू हुने नियम छ । कट बनाउने शीर्ष २१ प्रोफेसनल खेलाडी तथा त्यही स्कोर बनाउने एमेच्योर खेलाडीले अन्तिम दुई राउन्डका लागि स्थान बनाउने आयोजक नेपाल प्रोफेसनल गल्फर्स एसोसिएसनका महासचिव दीपक आचार्यले बताए ।

सूर्य नेपाल गल्फ टुर २०२४–२५ सिजनको यो अन्तिम प्रतियोगिता हो । प्रतियोगितामा ३७ प्रोफेसनल गल्फरले  सर्वाधिक १६ लाख पुरस्कार राशिका लागि प्रतिस्पर्धा गर्नेछन् । प्रतियोगितामा १८ उत्कृष्ट एमेच्योर खेलाडीको पनि सहभागिता हुनेछ ।

विजेताले ३ लाख रुपैयाँ पुरस्कार जित्नेछन् । दोस्रोले १ लाख ८५ हजार, तेस्रोले १ लाख २५ हजार, चौथोले १ लाख ५ हजार  र पाँचौं हुने खेलाडीले ९२ हजार रुपैयाँ जित्नेछन् । शीर्ष २१ भित्र रहने सबै खेलाडी नगद पुरस्कारको हकदार बन्नेछन् ।

सिजनभर उत्कृष्ट प्रदर्शन गर्दै तीन उपाधि जितेर ७ लाख ४२ हजार ५ सय पुरस्कार पाएका नीरज तामाङ यस सिजनको ‘अर्डर अफ मेरिट’ मा अगाडि छन् । तोरण शाही (४ लाख ९ हजार ५ सय) दोस्रो र भुवन नगरकोटी (३ लाख ६४ हजार ५ सय) तेस्रो स्थानमा छन् । नम्बर एक प्रो बन्ने दौडमा रहेका नीरजले सूर्य नेपाल इस्टर्न ओपन, वेस्टर्न ओपन र म्याच प्ले उपाधि जितेका थिए ।