काठमाडौँ — एथलेटिक्सको फिल्ड इभेन्टमा एकताका केशरी चौधरीले हलचल नै ल्याइन् । जुनियरदेखि सिनियरसम्म कीर्तिमानहरू एकपछि अर्को भंग गर्दै अगाडि बढिरहिन् । हाइजम्प, लङजम्प र ट्रिपलजम्पमा उनको वर्चस्व हुने गर्थ्यो । धेरै राष्ट्रिय कीर्तिमान केशरीकै नाममा छ । उनै केशरीको १८ वर्ष पुरानो कीर्तिमानलाई शुक्रबार दशरथ रंगशालामा अनिशा थारूले तोडिदिइन् ।

कीर्तिमान तोडिएको इभेन्ट हो ट्रिपलजम्प । १५ औं राष्ट्रपति रनिङ सिल्ड खेलकुदमा अनिशाले ११ दशमलव २७ मिटर जम्प गर्दै नयाँ जुनियर कीर्तिमान स्थापित गरिन् । यो इभेन्टमा केशरीको नाममा १०.८० मिटरको कीर्तिमान थियो, जुन २०६४ सालमा बनाएकी थिइन् । त्यतिबेला अनिशा त जन्मेकी नै थिइनन् । अनिशा त बल्ल १६ वर्ष पुगेकी छन् । 

संयोग, उनीहरूको घर भने एउटै पालिकामा पर्दछ । त्यो बाँकेको राप्ती सोनारी गाउँपालिका हो । दुवैको गाउँ भने वारिपारि छ । केशरीकै चर्चाबीच हुर्केकी अनिशाले उनकै रेकर्ड तोड्न पाउँदा आफूलाई भाग्यमानी ठानिन् । 

‘गाउँमा पनि केशरी दिदीको एकदमै चर्चा हुन्थ्यो । उहाँले एकपछि अर्को कीर्तिमान बनाइरहनुहुन्थ्यो । त्यसले पनि मलाई प्रेरित गर्‍यो । आज दिदीकै कीर्तिमान भंग गर्न पाउँदा भाग्यमानी ठानेकी छु,’ अनिशाले केशरीप्रति आभारी हुँदै भनिन् । 

सात कक्षा पढ्दादेखि खेलकुदतिर लागेकी अनिशाले राष्ट्रपति रनिङ सिल्ड केन्द्रस्तरमा खेलेको यो तेस्रो पटक हो । गत वर्ष नै ट्रिपलजम्पको स्वर्ण जितेकी थिइन् । रेकर्ड भने बनाउन सकिनन् । त्यसभन्दा अघिल्लो संस्करणमा रिलेमा स्वर्ण जितेर फर्केकी थिइन् । ती दुई संस्करण उनले लुम्बिनी प्रदेशबाट खेलिन् । 

यसपालि उनले बागमती प्रदेशको प्रतिनिधित्व गरिन् । अनिशा राजधानीको मनमैंजुस्थित लालीगुराँस नेसनल एकेडेमीमा अध्ययन गर्छिन् । ११ सकेर १२ कक्षाको तयारीमा छिन् । त्यसले गर्दा उनले बागमतीबाट खेल्ने अवसर पाइन् । 

४–४ स्वर्ण जितेका बागमती प्रदेशका अनिशा र प्रवीण रानामगर पदकका साथ ।

यसपल्टको राष्ट्रपति रनिङ सिल्डमा बागमती नै टिम च्याम्पियन भयो । बागमतीले ३६ स्वर्ण, ७ रजत र ११ कांस्य जितेर सिल्ड उचाल्यो । त्यसमा एथलेटिक्सको १२ स्वर्ण, ४ रजत र ३ कांस्य समावेश छ । एथलेटिक्ससहित भलिबल, कबड्डी, कराते, उसु र तेक्वान्दो गरी ६ खेलमा सात प्रदेशका ६ सय ८६ खेलाडीले प्रतिस्पर्धा गरेका थिए । 

अनिशाले ट्रिपलजम्पमात्र होइन, रिलेका दुई इभेन्टमा पनि कीर्तिमान बनाइन् । उनले ४ गुणा १०० मिटर (अनिशा, दिना गोपाली, भगवती खड्का र सुरुचि मोक्तान) र ४ गुणा ४०० मिटर (अनिशा, दिना, भगवती र अस्मिता भुजेल) मा कीर्तिमानसहित स्वर्ण जितेकी थिइन् । लङजम्पमा पनि स्वर्ण जितेकी अनिशाले ४०० मिटर दौडमा भने रजतमा सीमित भइन् । कुल ४ स्वर्ण र १ रजत जितेकी उनको अबको लक्ष्य सिनियर राष्ट्रिय कीर्तिमानतिर छ । भन्छिन्, ‘अन्तर्राष्ट्रिय खेलाडी बन्ने धोको छ । त्यसका लागि धेरै मिहिनेत त गर्नुपर्छ ।’ 

बागमतीबाट एथलेटिक्समा सहभागी २२ खेलाडीमध्ये ९ जना त लालीगुराँस नेसनल एकेडेमीकै थिए । उनीहरूलाई प्रशिक्षण गराइरहेका प्रशिक्षकद्वय देवी बस्नेत र सीताराम चौधरी यस रनिङ सिल्डमा आफ्ना खेलाडीले एथलेटिक्समा राम्रो प्रदर्शन गरेको सुनाए । अब सिनियर इभेन्टमा पनि उनीहरूले राम्रो प्रदर्शन दिनसक्ने प्रशिक्षक बस्नेतको अपेक्षा छ । लालीगुराँसले पनि खेलकुदमा एकदमै लगानी गरिरहेको छ । विभिन्न खेलका खेलाडीलाई छात्रवृत्ति दिएर अध्ययनसँगै प्रशिक्षणमा सहभागी गराइरहेको बस्नेत बताउँछन् ।

ट्रिपलजम्पमा अनिशालाई चुनौती दिएकी लुम्बिनीकी पिन्जु चौधरीले १०.३५ मिटर र कर्णालीकी सरिता शाहीले १०.१३ मिटर जम्प गरेर क्रमशः रजत र कांस्य पदक जिते । अनिशाले जस्तै बागमतीका लागि प्रवीण रानामगरले ४ स्वर्ण जिते ।

उनले १००, २०० मिटर दौड, ४ गुणा १०० र ४ गुणा ४०० मिटर रिलेमा स्वर्ण जितेका हुन् । प्रवीणले १०० र रिलेका दुई इभेन्टमा राष्ट्रिय कीर्तिमान बनाएका थिए । शुक्रबार १०० मिटर रिलेमा प्रवीणसहित सन्त दराई, सुविन लामा र नीरज शाहको बागमती टिमले ४३.४ सेकेन्डको कीर्तिमान बनायो । उनीहरूले २०८० सालमा सुजल, सुदीप थारू, तुल्सीराम चौधरी र रोहित गुप्तासम्मिलित लुम्बिनीले बनाएको ४४.०० सेकेन्डको कीर्तिमान तोडेका हुन् । 

यसपटक एथलेटिक्समा कुल ९ कीर्तिमान बने । प्रत्येक कीर्तिमानका लागि १० हजार पुरस्कार प्रदान गरिएको थियो । छात्र ट्रिपलजम्पमा सुदूरपश्चिमका विकास बुढाले स्वर्ण जिते । उनले १३.७३ मिटर जम्प गरे । सुदूरपश्चिमकै विक्रम नाथ दोस्रो र बागमतीका अविनाश सुनार तेस्रो भएका थिए । ३ हजार मिटर दौडमा कर्णालीका अनिल शाही विजेता भए । उनले ९ मिनेट ०८.९ सेकेन्डमा दौड पूरा गरे । कोशीका अमिर लिम्बू दोस्रो तथा लुम्बिनीका अरविन्दकुमार यादव तेस्रो बने । सोही स्पर्धाको छात्रामा सुदूरपश्चिमकी देवकी धामीले १० मिनेट ५२.९ सेकेन्डमा पूरा गर्दै स्वर्ण चुमिन् । बागमतीकी अस्मिता भुजेलले रजत र कर्णालीकी स्वस्तिका कठायतले कांस्य जिते ।

छात्र २०० मिटर दौडमा प्रवीण पहिलो हुलुम्बिनीका सुभम् वमरेल दोस्रो र गण्डकीका सुदीप भण्डारी तेस्रो भए । छात्रामा बागमतीकी दिना गोपाली स्वर्ण जित्दा लुम्बिनीकी आरुषि भट्टराई दोस्रो र गण्डकीकी अनुष्का अधिकारी तेस्रो भए ।

साबिक विजेता सुदूरपश्चिम दोस्रो

बागमती प्रदेशले सिल्ड उचाल्दा गत संस्करणको च्याम्पियन सुदूरपश्चिम प्रदेश १४ स्वर्ण, २० रजत र १८ कांस्यसहित दोस्रो भयो । लगातार ११, १२ र १३ औं संस्करणको विजेता लुम्बिनी प्रदेशले तेस्रो स्थानमा रह्यो । लुम्बिनीले ५ स्वर्ण, १३ रजत र १५ कांस्य जितेको थियो ।

गण्डकी प्रदेश ४ स्वर्ण, ११ रजत र १७ कांस्यसहित चौथो, कर्णाली प्रदेश ४ स्वर्ण, ६ रजत र १९ कांस्यसहित पाँचौं तथा मधेश प्रदेश ३ स्वर्ण, २ रजत र १० कांस्यसाथ छैटौं स्थानमा रहे । सातौं स्थानमा रहेको स्वर्णविहीन कोशी प्रदेशले ७ रजत र ८ कांस्य जित्यो । 

उसुमा बागमतीले ८ स्वर्ण, २ रजत र १ कांस्य जितेको थियो । सुदूरपश्चिम दोस्रो भयो । सुदूरले ३ स्वर्ण, ७ रजत र २ कांस्य जित्यो । लुम्बिनीले १ स्वर्ण र २ कांस्य जितेर तेस्रो भयो । चार प्रदेश स्वर्णविहीन बने । तेक्वान्दोमा बागमतीले ७ स्वर्ण र ३ कांस्य जित्यो । सुदूरपश्चिम ३ स्वर्ण र ४ रजतसाथ दोस्रो भयो । तेस्रो स्थानको मधेशले १ स्वर्ण, २ रजत र ४ कांस्य जित्यो । १२ स्पर्धा रहेको तेक्वान्दोमा बाँकी १ स्वर्ण कर्णालीले जितेको थियो । कर्णालीले १ रजत र ४ कांस्य पदक थप्यो ।