डन्डी, स्कटल्यान्ड — नेपाल र स्कटल्यान्डबीचको प्रतिस्पर्धा एसोसिएट क्रिकेटमा पछिल्लो समय निकै उच्च हुन थालेको छ । अधिकांश खेलहरू अन्तिम ओभर हुँदै अन्तिम बलसम्म पुगेर झिनो अन्तरमा टुंगिने गरेको छ । यसले एसोसिएट क्रिकेट साखलाई अझ उच्च बनाएको विश्लेषण गर्नेहरू पनि धेरै छन् ।
स्कटल्यान्डमा भ्रमणमा रहेको नेपालले विश्वकप क्रिकेट लिग–२ शृंखलामा घरेलु टोलीविरुद्ध खेलेको खेल तीव्र प्रतिस्पर्धाको उचाइमा थियो । डन्डीमा अन्तिम बलको प्रतिस्पर्धामा एक खेलमा नेपाल र अर्को खेलमा स्कटल्यान्डले नतिजा पल्टाउन सफल भए । नेपालले पहिलो खेल अन्तिम बलमा १ विकेटले जितेको थियो भने दोस्रो खेलमा २ रनको हार बेहोरेको थियो । नेपाल र स्कटल्यान्डबीच भएका केही तीव्र प्रतिस्पर्धा यस्ता छन् :
नेपाललाई अन्तिम बलको पीडा
डन्डी, ८ जुन २०२५
कप्तान रिची बेरिङ्टनले १ सय २ रन बनाएपछि टस जितेर ब्याटिङ रोजेको स्कटल्यान्डले निर्धारित ५० ओभरमा ६ विकेट गुमाई ३ सय २३ रन बनायो । स्कटल्यान्ड यो स्कोरमा पुग्न उनको सानदार ब्याटिङसँगै नेपालको कमजोर फिल्डिङ पनि उत्तिकै जिम्मेवार रह्यो । साथै डेथ ओभरमा नेपालको बलिङ निकै फितलो बनेको थियो । स्कटल्यान्डले अन्तिम १० ओभरमा १ विकेटमात्र गुमाएर १ सय २३ रन जोडेको थियो । माइकल लिस्क १४ रनमा हुँदा सोमपाल कामीले सामान्य क्याच छाडेका थिए । उनै लिस्कले ६२ बलमा ९६ रन बनाउनेक्रममा १२ चौका र ३ चौका प्रहार गरे ।
भीम सार्की, दीपेन्द्रसिंह ऐरी र सोमपाल कामीको अर्धशतकमा नेपालले ४९ ओभरमा ३ सय १७ रन बनाइसकेको थियो । यो नेपालले एकदिवसीय अन्तर्राष्ट्रियमा उच्च स्कोर बनाएको हो । अन्तिम ओभरमा नेपाललाई जितनिम्ति ७ रन आवश्यक थियो, क्रिजमा करण केसी र सन्दीप लामिछाने थिए । बलिङमा थिए ‘लोकल ब्वाइ’ साफ्यान सरिफ । उनी आफ्नो पहिलो ४ ओभरमा ३५ रन दिएर निकै महँगा बनिसकेका थिए । तर यहाँको विकेटलाई राम्रोसँग बुझ्ने भएर होला सायद स्कटल्यान्डले उनलाई अन्तिम ओभर बलिङ दिएको थियो । अन्तिम ओभरको पहिलो बलमा करणले २ रन लिए पनि तेस्रो बलमा ठूलो शट हान्दा आउट भए । अन्तिम बलमा नेपाललाई जितनिम्ति ३ रन चाहिँदा सरिफले ललित राजवंशीलाई बोल्ड गरी नाटकीय हिसाबमा स्कटल्यान्डलाई २ रनको जित दिलाए ।
करणको इनिङ्स र अविश्वसनीय जित
डन्डी, २ जुन २०२५
स्कटल्यान्डले लिग २ को प्रतिस्पर्धामा पहिला ब्याटिङ गर्दै निर्धारित ५० ओभरमा ७ विकेट गुमाई २ सय ९६ रन बनाएको थियो । चार्ली टिएर ७२ बलमा ८० र फिन्ले म्याकक्रिएथले ६७ बलमा ५५ रन बनाएपछि स्कटल्यान्डले नेपालले विशाल लक्ष्य तेर्स्याएको थियो ।
करण केसीले असाधारण ब्याटिङ प्रदर्शन गर्दै ४१ बलमा ३ चौका र ४ छक्का प्रहार गरी अविजित ६५ रन बनाएपछि नेपाल अन्तिम बलमा लक्ष्य पूरा गर्दै एकदिवसीय अन्तर्राष्ट्रियमा सबैभन्दा ठूलो विजय लक्ष्य पछ्याउन सफल भयो । करणले अन्तिम ओभरको चौथो र पाँचौं बलमा २–२ रन जोडेपछि नेपाललाई अन्तिम बलमा १ रन बनाउनुपर्ने समीकरण बनेको थियो । अन्तिम बलमा स्ट्राइक एन्डमा रिजन ढकाललाई लेग अम्पायरले रनआउट दिए पनि मुख्य अम्पायरले लेग साइडमा गएको त्यो बललाई वाइड दिएपछि नेपाल अविश्वसनीय हिसाबमा खेल जित्न सफल भयो ।
नेपालको पहिलो ‘क्लिन स्विप’
कीर्तिपुर, फेब्रुअरी २१, २०२३
स्कटल्यान्ड लिग २ को विजेता बनिसकेको थियो । शृंखलाको अन्तिम खेलमा जर्ज मुन्सीले ५० बलमा ६० रन बनाए पनि टोली ४६.१ ओभरमा २ सय १२ रनमा अलआउट भयो । नेपाली बलरहरूले आफ्नो जिम्मेवारी पूरा गरिसकेको अवस्थामा अब पालो ब्याटिङको थियो ।
तर ३२ औं ओभरमा नेपालले १ सय ३८ रन बनाउँदा ८ विकेट गुमाइसकेको थियो । रोहित पौडेलले यहींबाट आफ्नो परिपक्व भूमिका देखाए । उनले १ सय १ बलमा अविजित ९५ रन बनाएपछि नेपालले ४४.१ ओभरमा लक्ष्य पूरा गर्दै लिग २ को शृंखला पहिलो पटक ‘क्लिन स्विप’ गरेको थियो ।
साफ्यान सरिफको बलमा विजयी चौका प्रहार गरेपछि रोहितले आफ्नो मसल्स देखाउँदै गर्जिएर सेलेब्रेसन गरेका थिए । रोहितले यसलाई आफ्नो खेलजीवनको उत्कृष्ट इनिङ्स मान्दै आएका छन् । रोहितले करण केसीसँग नवौं विकेटमा ७५ रनको अविजित साझेदारी गरेका थिए । बलिङमा ३ विकेट लिएका करणले ब्याटिङमा पुनः अर्को उपयोगी इनिङ्स खेले । करणले ३७ बलमा २ चौका र १ छक्कासहित ३१ रन बनाए ।
अन्तिम ओभरको हार
ऐर, जुलाई २९, २०१५
स्कटल्यान्ड र उत्तरी आयरल्यान्डमा भएको ट्वान्टी–२० विश्वकप छनोटको निराशाजनक प्रदर्शनपछि नेपालले विश्व क्रिकेट लिग च्याम्पियनसिपमा स्कटल्यान्डविरुद्ध दुई खेल खेलेको थियो । स्थानीय स्कटिस कन्डिसनमा खेल्न नेपालका लागि त्यति सजिलो थिएन । वर्षाका कारण ३६ ओभरमा छोट्याइएको खेलमा स्कटल्यान्डले कप्तान प्रेस्टन मोमसेनको ७८ रनमा ७ विकेट गुमाई २ सय ३५ रन बनायो । कोन डी ल्याङ्गेले ४१ बलमा ४ चौका र २ छक्कासहित अविजित ५५ रन बनाएपछि स्कटल्यान्ड मजबुत बनेको थियो ।
महेश क्षेत्रीलाई २१ र ज्ञानेन्द्र मल्ललाई १८ रनमा गुमाए पनि अनिल मण्डल र कप्तान पारस खड्काको अविश्वसनीय ब्याटिङपछि नेपाल विजय नजिक पुगेको थियो । पारसले ५५ बलमा ४ चौका र २ छक्कासहित ७० रन बनाए । उनी र शरद भेषावकर लगातार बलमा आउट भए । अनिलले १ सय रन बनाए । त्यसका लागि उनले ९३ बल खेल्दै ९ चौका र १ छक्का प्रहार गरे । तर अन्तिम २ ओभरमा २५ रन बनाउन नसक्दा नेपालले ३ रनको हार बेहोर्नुपर्यो । अन्तिम ओभरमा नेपालले विजयनिम्ति १७ रन बनाउनुपर्ने थियो । सो ओभरको पहिलो बलमै अनिललाई आउट गरेका साफ्यान सरिफले १३ रनमात्र खर्चेपछि नेपालले ५ विकेट गुमाई २ सय ३२ रनमात्र बनाउन सक्यो ।
