काठमाडौँ — इन्टरनेसनल ओपन फ्रेन्डसिप तेक्वान्दो च्याम्पियनसिप (आईओएफटीसी) को १५ औं संस्करण नेपालमा हुने भएको छ। आईओएफटीसी नेपालको आयोजनामा आगामी पुस ३ देखि ५ गतेसम्म इन्टनेसनल फ्रेन्डसिप तेक्वान्दो च्याम्पियनसिप राष्ट्रिय खेलकुद परिषद् (राखेप) को कभर्डहलमा हुने सोमबार पत्रकार सम्मेलनमा जानकारी गराइयो।

आईओएफटीसीको प्रमुख कार्यालय अमेरिकाको पोर्टल्यान्डमा छ । इन्टरनेसनल ओपन फ्रेन्डसिप तेक्वान्दो च्याम्पियनसिप भने नेपालबाटै सन् २००० मा सुरु भएको हो। अहिले प्रतियोगिता सुरु भएको २५ वर्ष पुगेको अवसरमा फेरि नेपालमै हुने लागेको हो। यसअघि नेपालमा प्रतियोगिताका चार संस्करण आयोजना भइसकेको छ।

आईओएफटीसी हेड क्वाटरले प्रत्येक दुई वर्षमा इन्टरनेसनल ओपन फ्रेन्डसिप तेक्वान्दो च्याम्पियनसिप आयोजना गर्दै आएको संस्थाका निर्देशक दिवाकर डान महर्जनले जानकारी गराए। उनका अनुसार पालैपालो एक संस्करण अमेरिका र अर्को संस्करण अमेरिका बाहिर प्रतियोगिता हुँदै आएको छ। अमेरिकाको पोर्टल्यान्डमा ५ र मिचिगनमा १ संस्करण, नेपालमा ४ संस्करण, भारत, बेलायत, हङकङ र दक्षिण कोरियामा एक–एक संस्करण आयोजना भइसकेको महर्जनले बताए।  

प्रतियोगिताको रजत वर्षको अवसरमा हुन लागेको १५ औं संस्करण विशेष बनाउने लक्ष्य रहेको निर्देशक महर्जनले सुनाए । प्रतियोगिताका क्रममा ओलम्पिक स्वर्ण पदक विजेता तथा विश्व ओलम्पिक तेक्वान्दो फेडेरेसनका अध्यक्ष मुन डाइ सुङ र कुकिवनका प्रशिक्षक मिन हाक सिओ नेपाल आउनेछन् । त्यतिबेला हुने पुम्से सेमिनार उनै प्रशिक्षक सिओले सञ्चालन गर्नेछन् ।