तिलोत्तमा — रुपन्देहीमा जारी लीला मेमोरियल यू–१६ लुम्बिनी प्रदेशस्तरीय क्रिकेट प्रतियोगितामा कपिलवस्तुले पाल्पामाथि सहज जित निकालेको छ । 

सिद्धार्थ क्रिकेट मैदानमा शनिबार भएको खेलमा कपिलवस्तुले पाल्पालाई १ सय ९१ रनले पारजित गरेको हो । खेलाडी रौनक श्रीवास्तवको शतकीय पारी र मलिक गद्दीको उत्कृष्ट बलिङको मद्दतमा कपिलवस्तुले पहिले ब्याटिङ गर्दै जित निकाल्यो । निर्धारित ३५ ओभरमा ३४ ओभर ५ बल खेल्दै सबै विकेट गुमाएर उसले २ सय ३६ रनको बलियो योगफल बनायो । 

उसका लागि रौनक श्रीवास्तवले ८८ बलको सामना गर्दै १६ चौका र १ छक्काको मद्दतमा १ सय १० रनको शतकीय इनिङ खेले । त्यस्तै मुन्ताज अलीले ४२ र सुरज यादवले २० रनको योगदान गरे । बलिङमा पाल्पाका विष्णु न्यौपानेले ४, उपसन पाण्डेले ३ तथा हिमाल कँडेलले २ विकेट लिए ।