जनकपुरधाम — तेस्रो जनकपुरधाम मेयर कप टी–२० प्रतियोगिताको सेमिफाइनल समीकरण पूरा भएको छ । बुधबार बारा र भारतको लखनउले जितेसँगै सेमिफाइनलको समीकरण पूरा भएको हो । भारतको चारसहित १२ टिम सहभागी भएको यस प्रतियोगिताको सेमिफाइनलमा महोत्तरी, मुझफरपुर, लखनउ र बारा पुगेका छन् । 

बाराले भारतको दिल्लीलाई १ सय १ रनले र लखनउले रौतहटलाई ५ विकेटले पराजित गर्दै सेमिफाइनलमा स्थान निश्चित गरे । टस हारेर ब्याटिङ गरेको रौतहट १५.३ ओभर ६४ रनमै अलआउट भयो । सन्नी साहले २८ बलमा २० रन र नितेश यादवले १४ रन बनाए ।

लखनउका अस्मित मिश्रले ४ ओभरमा १९ रन दिएर ३ विकेट, शुभम यादव, सुमित पाठक र मनीष सिंहले समान २–२ तथा शिव सिंहले १ विकेट लिए । लखनउले १२.३ ओभरमा लक्ष्य पूरा गर्‍यो । अंकित सिंहले ११ बलमा २०, मनीष सिंह २२ बलमा १८ रन बनाएर अविजित रहे । रौतहटबाट राजेश यादव र आशिक बैठाले २–२ विकेट लिए । लखनउबाट ३ विकेट लिएका अस्मित प्लेयर अफ द म्याच घोषित भए ।