काठमाडौँ — नेपाल च्याम्पियन एफएम रूपेश जैसवालले शुक्रबार प्रभु महालक्ष्मी दोस्रो कोप ओपन र्‍यापिड रेटिङ चेस प्रतियोगिताको उपाधि जितेका छन् ।

रुपेश ९ चरणको खेलमा ८ अंक, प्रोग्रेसिभ ५२ प्वाइन्टका आधारमा विजेता बनेका हुन् । राष्ट्रिय सहकारी महासंघको आयोजना र प्रभु महालक्ष्मी लाइभ इन्स्योरेन्सको सहयोगमा आयोजित प्रतियोगिता विजेताले १० लाखबराबरको आवधिक जीवन बिमा र ४० हजार रुपैयाँ पुरस्कार पाए ।

नेपाल बुद्धिचाल महासंघको प्राविधिक सहयोगमा भएको स्पर्धामा समान ८ अंक जोडेका एफएम क्षितिज भण्डारी ५१ प्रोग्रेसिभ प्वाइन्टसहित दोस्रो स्थानमा रहे । क्षितिजले ७ लाखबराबरको आवधिक बिमासहित २५ हजार पुरस्कार जिते । अन्य आठ खेलाडीले समान ७ अंक जोडेर शीर्ष दसौं स्थान ओगटेका छन् । त्यसमा सीएम पुरुषोत्तम सिलवालले ५४.५ प्रोग्रेसिभ प्वाइन्ट जोडेर तेस्रो स्थान प्राप्त गरे । उनले ५ लाखबराबरको बिमा र १५ हजार पुरस्कार पाएका छन् । अन्तर्राष्ट्रिय सहकारी वर्षको अवसरमा आयोजित प्रतियोगितामा प्रकाशचन्द्र नेपाल, आशिष फुयाल, भारतका आशुतोष यादव, हर्कबहादुर चोङवाङ, धिरेन राई, अशोक मोहन श्रेष्ठ र शैलेन्द्र न्यौपाने क्रमशः चौथोदेखि दसौं स्थानमा रहे ।