धनकुटा — धनकुटामा सम्पन्न भलिबल उत्सवमा आयोजित प्रतियोगिताको पुरुष तर्फको उपाधि चौबिसे तथा महिला तर्फको उपाधि साँगुरीगढी गाउँपालिकाले हात पारेका छन् । भलिबल संघ धनकुटाले आयोजना गरेको उत्सवको फाइनलमा पुरुषतर्फ पाख्रिबास नगरपालिकालाई ३-१ सेटले हराउँदै चौबिसेले उपाधि हात पारेको हो ।

चौबिसेले पाख्रिबासलाई २०–२५, २५–२०, २५–२१ र २५–२१ पराजित गरेको हो। च्याम्पियन बनेको चौबिसे टिमले ५० हजार रूपैयाँ नगद, ट्रफी र प्रमाणपत्र प्राप्त गरेको छ । यस्तै, उपविजेता पाख्रिबास नगरपालिकाले ३० हजार रुपैयाँमा चित्त बुझाएको छ । 

उता, महिला तर्फको उपाधी साँगुरीगढीले हात पारेको छ । च्याम्पियन बनेको साँगुरीगढीले सहिदभूमिलाई साँगुरीगढीले २५–२१, २५–२२ र २५–१४ को सोझो सेटमा हराएको हो । उपाधिसँगै साँगुरीगढीले ५० हजार नगद, ट्रफी र प्रमाणपत्र प्राप्त गरेको छ। यस्तै उपविजेता बनेको सहिदभूमिले ३० हजारमा चित्त बुझाएको छ।