लिभरपुल — योर्गन क्लोपले भावपूर्ण बिदाइ लिएको २४ घण्टा पनि बितेको थिएन लिभरपुलले नयाँ प्रशिक्षकको नाम घोषणा गरिसकेको थियो । उनी थिए, आर्ने स्लट । उनको काँधमा ‘मिसन इम्पोसिबल’ को जिम्मेवारी बोकाइएको थियो । त्यतिमात्र होइन, उनलाई जादुयी क्लोपको ठाउँ पनि लिनु थियो । 

फेरि क्लोपको फुटबल रणनीति आफैंमा अत्यधिक आक्रामक थियो । उनलाई लिभरपुल सहर पनि उत्तिकै मनपर्थ्यो । क्लोपले ९ वर्ष मर्सिसाइड सहरमा बिताए र लिभरपुललाई दिलाए सात ठूला उपाधि । त्यसमा एउटा युरोपेली च्याम्पियन्स लिगको उपाधि पर्छ भने एउटा इंग्लिस प्रिमियर लिगको सफलता । 

खासमा लिभरपुलले ३० वर्षयता पहिलो पटक माथिल्लो डिभिजनको इंग्लिस लिग जितेको थियो । त्यसैले क्लोपलाई यसअघिका दुई महान् प्रशिक्षक बिल स्यान्कली र बब पेस्लीसँग पनि तुलना गर्न थालिएको थियो । यस्तोमा स्लटलाई पनि राम्रोसँग थाहा थियो काम कति गाह्रो छ । 

एकपछि अर्को उपाधि जित्ने प्रशिक्षकको ठाउँ लिन कति गाह्रो हुन्छ भने इतिहास फेरि धेरै पुरानो छैन । म्यानचेस्टर युनाइटेडमा एलेक्स फर्गुसनको ठाउँमा आएका डेविड मोयसको स्थिति के भयो, कसलाई थाहा छैन र ? अनि आर्सनलका आर्सन वेंगरले छाडेपछि जिम्मेवारी पाएका उनाइ इमरीलाई के भयो, त्यो पनि सबैलाई थाहा छ । खासमा दुवै प्रशिक्षक लामो समय टिकेनन् । तर स्लटले यस्तै गाह्रो कामलाई यति सजिलो बनाए कि मानौं त्यो स्टानली पार्कमा बिहान विस्तारै हिँडे जत्तिकै रह्यो । 

पछिल्लो सिजन प्रिमियर लिग उपाधिको होड दुई क्लब म्यानचेस्टर सिटी र आर्सनलबीच चलेको थियो । धेरैले यसपल्ट पनि यही प्रवृत्ति दोहोरिने अनुमान गरे, लिभरपुललाई उपाधि होडमा समेत राखेनन् । सबैले आशंकाले भरिएको आँखाले स्लटलाई हेरे र उनीबाट कसैले धेरै ठूलो आस पनि गरेनन् । बीबीसी स्पोर्ट्सका ३० फुटबल पण्डितलाई यो सिजन कसले लिग जित्छ भनेर प्रश्न गरिँदा कोही एकले पनि लिभरपुलको नाम लिएनन् । 

लिग के केही साता पुरानो मात्रै भएको थियो । स्पष्ट संकेत देखिन सुरु भएको थियो कि लिभरपुलले स्लटलाई फेयर्नुडबाट झिकाउनु गलत थिएन । उनीसँग लगभग ठ्याक्कै त्यही टिम थियो, जुन क्लोपले छाडेर गएका थिए । यही टिमले लिगका सुरुआती १० खेलमध्ये आठमा जित निकाल्यो । लिभरपुलको इतिहासमै कोही नयाँ प्रशिक्षकले पाएको सबैभन्दा राम्रो सुरुआत यही थियो । सिटीको खस्कँदो खेल अनि आर्सनलको उतारचढावपूर्ण प्रदर्शनले पनि लिभरपुल सजिलो नै बनायो । 

त्यसैले एक साता छाडेर सेप्टेम्बर १८ यता सधैं लिभरपुल अंकतालिकाको शीर्षमै रह्यो । यसबीच लिभरपुलले गुमाएको खेल भनेको दुई मात्रै रह्यो । त्यसो त स्लटको नेतृत्वमा सबथोक राम्रै मात्र भएको छैन । उनलाई आलोचना गर्ने आधार पनि छन् । जसरी लिभरपुल लिग कपको फाइनलमा न्युकासल युनाइटेडसँग हार्‍यो, जसरी एफए कपमा दोस्रो डिभिजनको प्लेमाउथसँग पराजित भयो, ती कुनै पनि दृष्टिकोणले खराब नै थिए । 

अझ युरोपेली च्याम्पियन्स लिगमा पेरिस सेन्ट जर्मेन (पीएसजी) सँग हारेर लिभरपुल प्रतियोगिताबाटै बाहिरिनु पनि त निराशाजनक रह्यो । लिभरपुलका लागि सबैभन्दा महत्त्वको उपाधि भने लिग नै थियो, यसमा दुविधा छैन । अहिलेको समेत गरेर लिभरपुल २० पल्ट इंग्लिस च्याम्पियन भएको छ । 

आफ्नो पारम्परिक शत्रु क्लब युनाइटेडसँग माथिल्लो डिभिजनको उपाधि जितेको संख्यामा बराबरी गरेको छ । खासमा लिभरपुलका लागि यो नै ठूलो हो । 

यही एक उपलब्धि कारण स्लटले ठूलो न ठूलो उपलब्धि चुमेका छन्, जुन यसअघि डेब्यु सिजनमै लिग जितेर चेल्सीमा जोसे मोउरिन्हो, चेल्सीमै कार्लो एन्सेलोट्टी, सिटीमा म्यानुयल पेलेग्रिनी र फेरि चेल्सीमै एन्टोनियो कोन्टेले चमत्कार गरेका थिए । केहीलाई अझै लाग्न सक्छ, क्लोप छँदा लिभरपुल जति आक्रामक देखिएको थियो, अहिले छैन । लिभरपुलको खेल हेर्दा पनि उति साह्रो सनसनी हुन्न । बरू लिभरपुल यसपल्ट अलिकति बढी नै अनुशासित देखिएको छ । 

तर यी सबै आरोपमा स्लटलाई कुनै रुचि हुने छैन । लिभरपुलले अहिलेसम्म खेलेका ३४ खेलमध्ये ५ लाई छाडेर सबैमा दुई वा त्यो बढी भन्दा गोल गरेको छ । अंकतालिकामै सबैभन्दा बढी गोल गर्ने त लिभरपुल नै छ । खासमा लिभरपुल टिमसँगै सुरुमै विश्वस्तरीय खेलाडीको एक हुल थियो, तिनैलाई स्लटले अलिकति बढी आत्मविश्वासी बनाउने काम गरे । त्यसैले उनलाई कोही ठूलो नाम भएका खेलाडी किन्नुपरेन ।