काठमाडौँ — एपीएफ र नेपाल पुलिस क्लब आठौं केएनपी शेरबहादुर खड्का स्मृति राष्ट्रिय महिला भलिबल प्रतियोगितामा विजयी भएका छन् ।

त्रिपुरेश्वरस्थित राखेप कभर्डहलमा भएको समूह ‘ए’ को लिग खेलमा साबिक विजेता एपीएफले त्रिभुवन आर्मी क्लबलाई २५–२०, २५–१३, २५–१६ को सोझो सेटमा हरायो । एपीएफ छ पटक विजेता हो ।

शेरबहादुर खड्का स्मृति प्रतिष्ठानद्वारा आयोजित प्रतियोगिताको समूह ‘बी’ मा पुलिसले पूर्व विजेता न्यु डायमन्ड स्पोर्ट्स क्लबलाई २५–१४, २५–२२, २५–१३ ले हरायो । पाँच टिम सहभागी प्रतियोगिताको समूह ‘बी’ दुई टिममात्र रहेकाले पुलिस विजेता बन्दै सेमिफाइनल पुगेको छ । न्यु डायमन्ड पनि उपविजेता हुँदै सेमिफाइनलमा पुग्यो ।

बिहीबार दुई खेल हुनेछ । आर्मी र एभरेस्ट भलिबल क्लब तथा एपीएफ र एभरेस्टबीच प्रतिस्पर्धा हुनेछ ।

प्रतियोगिताको राखेपका सदस्य–सचिव टंकलाल घिसिङले उद्घाटन गर्दै प्रतिष्ठानले महिला भलिबलको विकासमा योगदान पुर्‍याइरहेको बताए ।