काठमाडौँ — खुसी बिक, गजेन्द्र बर्देवा र अभिषेक परियार आठौं राष्ट्रिय स्केटबोर्ड च्याम्पियनसिपको आफ्नो विधामा विजेता भएका छन् । नेपाल स्केटिङ तथा स्केटबोर्डिङ संघको आयोजनामा भएको च्याम्पियनसिपमा महिला खुलातर्फ खुसी विजेता भइन् । लेमन मगर दोस्रो र समिक्षा राईले तेस्रो भए ।
खुला पुरुषतर्फ गजेन्द्र प्रथम, शरद राई दोस्रो र वसन्त राई तेस्रो भए । पुरुष जुनियरतर्फ अभिषेक प्रथम, अंकित बिक दोस्रो र अविनाश कुमाल तेस्रो भए ।
खुला विजेताले २५ हजार, दोस्रोले २० हजार र तेस्रोले १५ हजार, जुनियर विजेताले १० हजार, दोस्रोले ५ र तेस्रोले ३ हजार रुपैयाँ पुरस्कार पाएको आयोजक संघका महासचिव सत्य थापाले बताए ।
विजेता खेलाडीलाई नेपाल ओलम्पिक कमिटीका अध्यक्ष जीवनराम श्रेष्ठ, नेपाल स्केटिङ तथा स्केट बोर्डिङ संघका अध्यक्ष अच्युत खनाल, प्रशिक्षक दिलीपराज बराललगायतले पुरस्कृत गरे ।
शनिबारै राष्ट्रिय खेलकुद परिषदका सदस्यसचिव टंकलाल घिसिङले प्रतियोगिताको उद्घाटन गर्दै ओलम्पिकमा खेल जित्ने गरेर तयारी गर्न खेलाडीलाई तयारी गर्न आग्रह गरेका थिए ।
