तिलोत्तमा — रुपन्देहीमा १० औं मणिमुकुन्द कप पुरुष भलिबल इन्डो–नेपाल क्लब च्याम्पियनसिप आजदेखि सुरु हुँदैछ ।

मणिमुकुन्द क्लबको आयोजनामा वैशाख १३ गतेसम्म सञ्चालन हुने रात्रिकालिन प्रतियोगितामा ३ विभागीय र एक भारतीयसहित ९ वटा क्लबको सहभागिता रहनेछ ।

उद्घाटन खेलमा आयोजक मणिमुकुन्द भलिबल क्लब र पाहुना टोली भारतको साग भलिबल एकेडेमीबीच प्रतिस्पर्धा हुनेछ । मणिमुकुन्द खेल मैदानमा प्रतियोगिता साँझ ६ बजेदेखि सुरु हुनेछ ।

प्रतियोगितामा त्रिभुवन आर्मी, नेपाल पुलिस क्लब, नेपाल एपीएफ क्लब, गण्डकी भलिबल संघ, कोशी प्रदेश भलिबल संघ, गलकोट भलिबल क्लब बाग्लुङ, मणिमुकुन्द भलिबल क्लब, सुदूरपश्चिम खेलकुल परिषद् र भारत गुजरातको साग भलिबल एकडेमी गरी कुल ९ वटा टिमको सहभागी छन् ।

प्रतियोगिताका विजेताले ३ लाख ११ हजार १ सय ११ रुपैयाँसहित ट्रफी, मेडल र प्रमाणपत्र प्राप्त गर्नेछन् । त्यस्तै, उपविजेताले २ लाख, ११ हजार १ सय ११ रुपैयाँ प्राप्त गर्नेछन् । तेस्रो स्थान हासिल गर्ने टिमलाई १ लाख ११ हजार १ सय ११ रुपैयाँ प्रदान गरिने आयोजकले जनाएको छ । खेलमा सान्त्वना स्थान हासिल गर्ने टिमले ६६ हजार ६ सय ६६ रुपैयाँ प्राप्त गर्नेछन् भने अन्य ८ विधामा समेत नगद पुरस्कार प्रदान गरिने क्लबका अध्यक्ष लोकेन्द्र भण्डारीले बताए ।

बेस्ट प्लेयरलाई १५ हजार रुपैयाँसहित र कप र प्रमाणपत्र प्रदान गरिने छ । यस्तै, बेस्ट सटरलाई १० हजार रुपैयाँ र बेस्ट ब्लकरलाई पनि १० हजार रुपैयाँ प्रदान गरिने आयोजकले जनाएको छ ।