काठमाडौँ — नेपाल यू–१९ ले एसीसी यू–१९ विश्वकप एसिया छनोटमा बुधबार हङकङ यू–१९ विरुद्ध पहिला बलिङ गरिरहेको छ । नेपालले तल्लो मूलपानी क्रिकेट मैदानमा टस जितेपछि हङकङलाई ब्याटिङका लागि बोलाएको हो ।
नेपाली टोलीमा एक परिवर्तन गरिएको छ । तीब्र बलर दयानन्द मण्डलको स्थानमा नेपालले विपीन शर्मालाई खेलाएको छ ।
चार महिनाअघि सम्पन्न नेपाल प्रिमियर लिग (एनपीएल) क्रिकेटमा इमर्जिङ प्लेयरमा चुनिएका विपिनको प्रतियोगितामा यो पहिलो खेल हो । उनले पहिलो खेलमै हङकङविरुद्ध विकेट पनि लिइसकेका छन् ।
यतिबेला हङकङले ८ ओभरको समाप्तिमा १ विकेट गुमाएर ३२ रन बनाएको छ ।
नेपालले पहिलो दुई खेल जितिसकेको छ । पहिलो खेलमा यूएईलाई ५ रनले पराजित नेपालले दोस्रो खेलमा ओमानमाथि ८ विकेटको विजय हात पारेको थियो । हङकङ पहिलो खेलमा ९० रनमा अलआउट भएपछि अफगानिस्तानसँग ८ विकेटले पराजित भएको थियो ।
अफगानिस्तानले पनि पहिलो दुई खेल जितिसकेको छ । नेपाल, ओमान, यूएई अफगानिस्तान र हङकङ समावेश यो प्रतियोगिता राउन्ड रोबिनको आधारमा हुनेछ र विजेता टोली आईसीसी यू–१९ विश्वकपमा पुग्ने छ ।
