काठमाडौँ — बसिर अहमद र नन्दन यादवको साहसका बाबजुद नेपाल चारदेशीय ट्वान्टी–२० क्रिकेट प्रतियोगिताको फाइनलमा कुवेतसँग ३ रनले पराजित भएको छ । हङकङमा भइरहेको प्रतियोगितामा आइतबार १ सय ७५ रनको लक्ष्य लिएर आएको नेपालले १४ ओभरमा ९२ रन बनाउँदा ८ विकेट गुमाइसकेको थियो ।

नेपाललाई बाँकी ३६ बलमा ८३ रन बनाउनुपर्ने चुनौती थियो । यहींबाट बसिर र नन्दनले नवौं विकेटमा २८ बलमा ७२ रनको साझेदारी गरेपछि नेपाल विजयको नजिक पुगेको थियो । नन्दन १४ बलमा २ चौका र ४ छक्का प्रहार गरी ३७ रनमा आउट भए । त्यसपछि आएका ललित राजवंशीले २ बलमा कुनै पनि रन बनाउन सकेनन् । 

अन्तिम ओभरमा नेपाललाई जितका लागि ११ रन चाहिन्थ्यो र हातमा १ विकेट मात्र बाँकी थियो । बसिरले अन्तिम ओभरको पहिलो बलमै छक्का प्रहार गरे, जुन नो बल पनि रहेको थियो । यस्तो अवस्थामा नेपाललाई ५ बलमा विजयका लागि ४ रन मात्र बनाउनुपर्ने थियो । तर त्यसपछिको दुई बलमा कुनै रन बनाउन नसकेको बसिर चौथो बलमा आउट हुन पुगेपछि नेपाली टोली स्तब्ध हुन पुग्यो । बसिरले ४३ बल खेली ८ चौका र ४ छक्कासहित ८० रन बनाए ।