कास्की — प्रथम एलिट भलिबल कपमा पुरुषतर्फ पर्वत र महिलातर्फ आयोजक एलिट भलिबल टिम च्याम्पियन बनेका छन् । एलिट भलिबल एकेडेमीको आयोजनामा पोखरा महानगरपालिका–३ नदीपुरमा सोमबार भएको प्रतियोगिताको फाइनलमा पर्वत र आयोजक एलिट विजेता बनेका हुन् ।

पर्वतले पिरामिड कन्ट्रक्सन हङकङलाई ३–१ को सेटमा पराजित गरेको राष्ट्रिय भलिबल टिम कप्तान एवं प्रतियोगिता संयोजक अरुणा शाहीले जानकारी दिइन् । पहिलो सेट २६–२४ र दोस्रो सेट २५–२१ ले आफ्नो पक्षमा पारेको पर्वतले तेस्रो सेट १७–२५ ले पिरामिड कन्ट्रक्सनलाई सुम्पिएको थियो । चौंथो सेटमा २५–२२ को जित निकाल्दै पर्वतले उपाधि हात पारेको हो । उपाधिसँगै पर्वतले १ लाख, उपविजेता पिरामिडले ५० हजार रुपैयाँसहित ट्रफी र प्रमाणपत्र पाए ।

महिलातर्फ आयोजक टोली एलिट भलिबलले बागलुङ नगरपालिकालाई ३–० को सोझो सेटमा पराजित गर्दै उपाधि जित्यो । एलिट भलिबलले पहिलो सेटमा २५–२२, दोस्रो सेटमा २५–१६ र तेस्रो सेटमा २५–१६ को सहज जित निकाल्यो । च्याम्पियन एलिट भलिबलले ५० हजार रुपैयाँसहित ट्रफी हात पार्‍यो । उपविजेता बागलुङ नगरपालिकाले २५ हजार रुपैयाँसहित ट्रफी प्राप्त गर्‍यो ।