बेंगलुरु — महेन्द्रसिंह धोनी कप्तानी भूमिकामा फर्किए पनि इन्डियन प्रिमियर लिग (आईपीएल) क्रिकेटमा चेन्नई सुपर किंग्सको भाग्य परिवर्तन भएन । टोली शुक्रबार कोलकाता नाइट राइडर्ससँग ८ विकेटले पराजित भएको छ । पाँचपटकको विजेता कोलकाता लगातार ५ खेलमा पराजित भएको छ । 

टस हारेपछि ब्याटिङमा आएको चेन्नईले निर्धारित २० ओभरमा १०३–९ को स्कोरमात्र बनाउन सक्यो । आईपीएलमा रहेको आफ्नो ७९ रनको न्युन स्कोर पार गर्न चेन्नईलाई हम्मे परेको थियो । रचिन रवीन्द्र ४, डेभोन कोन्वे १२, राहुल त्रिपाठी १६ र विजय शंकर २९ रन बनाए । विजयले २१ बल खेल्दै २ चौका र १ छक्का प्रहार गरे । 

नियमित कप्तान ऋतुराज गायकवड घाइते भएर आईपीएलबाट बाहिरिएपछि नेतृत्व जिम्मेवारी लिएका धोनी १ रनमै आउट भए । शिवम दुवे २९ बल खेल्दै ३ चौकासहित ३१ रनमा अविजित रहे । कोलकाताबाट सुनिल नारिनले ३ विकेट लिए । उनले ४ ओभरमा १३ रनमात्र खर्चे । हर्षित रानाले ४ ओभरमा १६ र वरुण चक्रवर्तीले ४ ओभरमा २२ रन खर्चेर २–२ तथा वैभव अरोरा र मोइन अलीले १–१ विकेट लिए ।