दाङ — लुम्बिनी प्रदेशस्तरीय ट्वान्टी-२० क्रिकेट प्रतियोगिता-२०८१ मा दाङ पाल्पालाई हराउँदै सेमिफाइनल प्रवेश गरेको छ । पाल्पालाई हराउन दाङका तुलबहादुर थापाले अलराउण्डर प्रदर्शन गरे ।

घोराही-१७ गुलरियास्थित घोराही क्रिकेट रंगशालामा मंगलबार १६३ रनको विजयी लक्ष्य पछ्याएको पाल्पाले निर्धारित २० ओभर खेल्दै ६ विकेटको क्षतिमा १४६ रन मात्रै बनाएपछि दाङले १६ रनको जीत हासिल गरेको हो ।

निकै प्रतिस्पर्धात्मक खेलमा पाल्पाका लागि नरबहादुर सार्की र लीला शर्माले ८६ रनको साझेदारी गर्दै जीत नजिक पुर्याएपनि दाङले उत्कृष्ट पुनरागमन गरेपछि पाल्पा क्वाटरफाइनलबाट बाहिरिएको हो । १० बलमा २२ रन चाहिएको अवस्थामा पाल्पाका लीला शर्मा लङअनबाट किशन भारतीले गरेको थ्रो मा रनआउट भएपछि दाङलाई जीतको आधार बनेको हो । १९ औँ ओभरमा दाङका बीरबहादुर घर्तीले पाल्पाको साझेदारी तोड्दै जित दिलाए । १८ दशमलव ३ ओभरमा पाल्पाका लीला आउट हुँदा लगत्तै १८ दशमलव ४ ओभरमा अर्का सेट ब्याटर नरबहादुर सार्की बोल्ड आउट भए ।

लीलाले ३४ बलमा ३ छक्का र ४ चौकाको मद्दतमा ४६ रन जोडेर आउट भए । यसैगरी नरबहादुरले २३ बलमा ३ छक्का र ४ चौकासहित ४५ रन जोडे । पाल्पाका मनिष न्यौपानेले १३ रन, रुपेश बस्याल र बिपिन खातीले समान ६-६ रन जोडे । दाङका किशन भारतीले २ ओभरमा ५ रन दिएर २ विकेट लिए । बीरबहादुर घर्ती, राजकुमार कुमाल र तुलबहादुर थापाले समान १-१ विकेट लिए ।

यसअघि, टस हारेर पहिले ब्याटिङको निम्तो पाएको दाङका लागि तुलबहादुर थापाले उत्कृष्ट पारी खेल्दै अविजित ६३ रन बनाए । जारी प्रतियोगितामा यो दोस्रो अर्धशतक पनि हो । दाङले ७ विकेटको क्षतिमा १६२ रन बनायो । तुलबहादुरले जम्मा ३० बलमा ५ छक्का र ३ चौकाको मद्दतमा अविजित ६३ रन जोडे ।