धनकुटा — धनकुटाको सहिदभूमि गाउँपालिकास्थित घँगरुमा सञ्चालन भएको पाँचौ सहिद प्रकाश थापा स्मृति कप अन्तरपालिका भलिबल प्रतियोगिताको बिहीबार सम्पन्न खेलमा भोजपुरका हतुवागढी र षडानन्द विजयी भएका छन् । 

आयोजक सहिदभूमि र हतुवागढीबीचको खेलमा हतुवागढीले सोझो सेटमा जित हात पारेको हो । क्रमशः २५–१९, २५–१४ र २५–११ स्कोरका साथ हतुवागढीले सहज जित निकाल्यो । यस्तै, भोजपुरको षडानन्द र मोरङको बेलबारीबीचको खेलमा षडानन्द विजयी भएको छ । उसले बेलाबारीका लागि २०–२५, २५–१९, २५–१० र २५–२१ को स्कोरमा जित हात पार्‍यो ।

शुक्रबारको खेल आयोजक टिमविरुद्ध षडानन्द र हतुवागढी र बेलबारीबीच हुने आयोजकले जनाएको छ । पहिलो दिन बुधबार साँगुरीगढी र आयोजकबीचको खेलमा आयोजक विजयी बनेको थियो ।