विराटनगर — लेटाङ फुटबल क्लब पाँचौं मिल्स गोल्डकप फुटबल प्रतियोगिताको फाइनलमा पुगेको छ । विराटनगरस्थित जुट मिल मैदानमा शुक्रबार सेमिफाइनलमा घरेलु टिम पेमा युवा स्पोर्टिङ क्लबलाई ६–३ गोलले हराएर लेटाङ फाइनल पुगको हो । उपाधिका लागि आइतबार लेटाङले उदयपुरको फ्युजन फुटबल क्लब गाइघाटसँग प्रतिस्पर्धा गर्नेछ । 

लेटाङबाट सौगात राईले २, विवेक राई, अनुप मगर, सन्दीप मगर र किरण शंकरले १–१ गोल गरे । पेमाको तर्फबाट निशान्त राई, रोशन राई र प्रनिश न्यौपानेले १–१ गोल गरेका थिए । चौथो मिनेटमा पेमाका निशान्तले गोल गर्दै टिमलाई अग्रता दिलाए । 

५ मिनेट बित्न नपाउँदै पेमाका रोशन राईले नवौं मिनेटमा गोल गरी अग्रता दोब्बर बनाए । यो अग्रता पहिलो हाफसम्म मात्रै टिक्यो । नवौं मिनेटमा २–० गोलले लेटाङ पछि परेपछि आक्रामक खेल पस्कियो । त्यसपछि लेटाङका खेलाडी विवेक राईले २३ औं मिनेटमा पुजन चौधरीले निकालेको पासमा गोल गरे । खेलको ३२ औं मिनेटमा अनुपले अर्को गोल गर्दै खेल बराबरीमा ल्याए । पहिलो हाफसम्म २–२ गोलको बराबरी भयो । दोस्रो हाफपछि लेटाङले आक्रामक खेल पस्कियो ।