पाँचथर — मच्छिन्द्र फुटबल क्लब काठमाडौंलाई हराउँदै नमोबुद्व फुटबल क्लब सप्तरी पाँचथरको फिदिममा आयोजित पाँचौं संस्करणको पाँचथर गोल्डकप विजेता बनेको छ ।

शनिबार फिदिम माध्यमिक विद्यालयको खेल मैदानमा सम्पन्न फाइनल खेलमा सप्तरीले मच्छिन्द्र फुटबल क्लब काठमाडौंलाई १–० गोल अन्तरले हराँउदै उपाधि चुमेको हो । सप्तरीको जितमा विदेशी खेलाडी एलेक्सले ७२ औं मिनेटमा गरेको गोल नै निर्णायक बन्यो । यो जितसँगै सप्तरीले नगद ११ लाख १ हजार १ सय ११ रुपैयाँ नगद पुरस्कारसहित ट्रफी मेडल र प्रमाणपत्र प्राप्त गर्दा उपविजेता मच्छिन्द्रले ५ लाख ५५ हजार ५ सय ५५ रुपैयाँ नगदसहित ट्रफीमा चित्त बुझायो । शनिबारको खेलमा सप्तरीका निर्मल छिरिङ म्यान अफ दि म्याच घोषित हुँदै नगद ७ हजार पाँच सयसहित पुरस्कृत भए ।