झापा — इण्डो-नेपाल टी-ट्वान्टी क्रिकेट प्रतियोगितामा बिहीबार  भारतको पेनोरिस-११ ले बौद्धमोड क्रिकेट क्लबलाई ३६ रनले पराजित गरी फाइनल प्रवेश गरेको छ।

झापाको मेचीनगर-४ बाहुनडाँगीस्थित सरस्वती माविको खेल मैदानमा टस जितेर पहिले ब्याटिङ गरेको पेनोरिसले १९ दशमलव ५ ओभरमा सबै विकेट गुमाउँदै १ सय ८३ रन बनायो। पेनोरिसका सुभांकर देवनाथले सर्वाधिक ४३ रन बनाए भने सिन्टु देव र एमडी अहमेदले समान २७, कुमार रोयले २५ रन तथा विनोमली रोय र अरिन्दम रक्षितले समान १७ रनको योगदान दिए।

बौद्धमोडका बलरहरूमध्ये सुजन रिजालले सर्वाधिक ४ विकेट लिए। त्यसैगरी अमन विश्वकर्माले ३, भोला रोयले २ र रोमसन एमडीले १ विकेट हात पारे।

१ सय ८४ रनको लक्ष्य पछ्याएको बौद्धमोडले निर्धारित २० ओभरमा सबै विकेट गुमाउँदै १ सय ४७ रन मात्रै बनाउन सक्यो। बौद्धमोडका रमजान एमडीले सर्वाधिक ४० रन बनाए भने सागर मजुमदारले २९, रोशन शर्माले २४ र अमन विश्वकर्माले २२ रन बनाए। अन्य ब्याट्सम्यानले राम्रो प्रदर्शन गर्न नसक्दा टिम सेमिफाइनलबाटै निराश भयो ।