दाङ — प्रधानमन्त्री कप पुरुष एक दिवसीय क्रिकेट प्रतियोगिताअन्तर्गत सोमबार लमहीस्थित देउखुरी अन्तर्राष्ट्रिय क्रिकेट रंगशालामा भएको खेलमा सुदूरपश्चिम प्रदेश विजयी भएको छ ।

किरण ठगुन्नाको अविजित १ सय २१ रनको मद्दतमा सुदूरपश्चिम प्रदेशले गण्डकी प्रदेशविरुद्ध ६ विकेटको सहज जित हासिल गरेको हो । सुदूरपश्चिमले २ सय २१ रनको लक्ष्य ४३ ओभरमा ४ विकेटको क्षतिमा पूरा गर्यो ।

सुदूरपश्चिमका लागि किरण ठगुन्नाले विस्फोटक पारी खेल्दै १ सय १ बलमा ६  छक्का र ९ चौकाको मद्दतमा १ सय २१ रन बनाउँदा नारायण जोशीले ३८ रनको अविजित योगदान दिए । यस प्रतियोगितामा किरण ठगुन्ना शतक बनाउने पहिलो खेलाडी बनेका छन् । यसैगरी, सुदूरपश्चिमका लागि खडक बोहराले १९ रन,  निश्चल क्षेत्रीले १८ रनको योगदान दिए । गण्डकी प्रदेशका विपिन खत्री, अमृत गुरुङ, कमल परियार र अर्जुन कुमालले समान १–१ विकेट लिए ।

यसअघि टस जितेर पहिले ब्याटिङ गरेको गण्डकी प्रदेशले आठ विकेटको क्षतिमा २ सय २० रन बनायो । गण्डकी प्रदेशका लागि दीपक डुम्रे र अर्जुन कुमालले अर्धशतकीय पारी खेले । दीपक डुम्रेले ६०, अर्जुन कुमालले ५७, सुदीप अर्यालले २३, वंश क्षेत्रीले १८, दिनेश बुढा मगरले १५, अमृत गुरुङ र विपिन खत्रीले समान १०–१० रनको योगदान दिए ।