काठमाडौँ — नेपाली महिला राष्ट्रिय क्रिकेट टोलीले लगातार नौ खेलको हारको शृंखला टुंग्याएको छ । युगान्डामा भइरहेको चारदेशीय प्रतियोगितामा नेपालले आइतबार घरेलु टोलीमाथि १ विकेटको रोमाञ्चक विजय हात पारेको छ । १० खेलपछि नेपालले पहिलो विजय हात पारेको हो । 

गत वर्षको जुलाई १९ मा यूएईलाई एसिया कपमा श्रीलंकामा ६ विकेटले पराजित गरेयता नेपाल जितविहीन रहेको थियो । त्यसै प्रतियोगितामा भारत र पाकिस्तानसँग पराजित नेपाली टोली अघिल्लो महिना घरेलु मैदानमा भएको त्रिकोणात्मक शृंखलामा नेदरल्यान्ड्स र थाइल्यान्डसँग ३–३ पटक पराजित भएको थियो । शनिबार यसै प्रतियोगिताको पहिलो खेलमा नेपाललाई नामिबियाले ४ विकेटको हार भोगाएको थियो । 

नेपालले टस जितेपछि ब्याटिङको निम्तो पाएको युगान्डाले इन्टेबेमा निर्धारित २० ओभरमा ७ विकेट गुमाई ७५ रन मात्र बनाउन सक्यो । ओपनर इमाकुलेट नाकिसुयीले सर्वाधिक २२ रन बनाइन् । उनले ४० बल खेली ३ चौका प्रहार गरिन् । स्टेफानी नामपिनाले २५ बलमा १४ र मालिसा अरिकोटले २४ बलमा ११ रन बनाइन् । नेपालबाट पूजा महतोले ३ विकेट लिइन् । ओपनिङ बलर उनले ४ ओभरमा १ मेडन राख्दै १४ रन खर्चिन् । कप्तान इन्दु बर्माले ४ ओभरमा १ मेडन राख्दै ८ रन खर्चेर २ विकेट लिइन् ।