भारतको हिल्स फुटबल एकेडेमी ४–० गोल अन्तरले पराजित
पाँचथर — चर्च ब्वाइज युनाइटेड काठमाडौं पाँचौं पाँचथर गोल्डकको सेमिफाइनलमा प्रवेश गरेको छ । आइतबार सम्पन्न खेलमा भारतको हिल्स फुटबल एकेडेमीलाई ४–० गोल अन्तरले हराउँदै चर्च ब्वाइजले सेमिफाइनल यात्रा तय गरेको हो ।
प्रतियोगितामा चर्च ब्वाइजका राज भुसाल (९ नम्बर) ले २ गोल गरे । खेल सुरु भएको छैटौं मिनेटमा विदेशी खेलाडी फोफोनाले पहिलो गोल गर्दै चर्च ब्वाइजको खाता खोलेका थिए । दोस्रो गोल आठौं मिनेटमा अर्का खेलाडी राज भुसाल (१० नम्बर) ले गरे ।
मध्यान्तरअघि २–० ले अग्रता लिएको चर्च ब्वाइजका तर्फबाट तेस्रो गोल मध्यान्तर पछि ६४ औं मिनेटमा अभिशेक महतो र चौथो गोल अतिरिक्त समयमा राज भुसाल (९ नम्बर) ले गरे ।
दुई गोल गरेका भुसाल म्यान अफ दि म्याच घोषित हुँदै नगद ७ हजार ५ सयसहित पुरस्कृत भए ।
सोमबार हिमालयन शेर्पा क्लब काठमाडौं र मछिन्द्र फुटबल क्लब काठमाडौंबीच खेल हुने आयोजक पाँचथर क्लबले जनाएको छ ।
फागुन २४ देखि सुरु पाँचौं संस्करणको पाँचथर गोल्डकपमा नेपाल र भारतका ८ टिम सहभागी थिए । भारतको हिल्स एकेडेमी र आयोजक पाँचथर क्लब प्रथम चरणबाटै बाहिरिएका छन् ।
