लाहोर — आईसीसी मेन्स च्याम्पियन्स ट्रफी क्रिकेटको उपाधि भिडन्तमा भारतले न्युजिल्यान्डको सामना गर्ने भएको छ । न्युजिल्यान्डले बुधबार भएको दोस्रो सेमिफाइनलमा दक्षिण अफ्रिकालाई ५० रनले पराजित गर्‍यो ।

जितका लागि ३ सय ६३ रनको चुनौतीपूर्ण लक्ष्य पाएको दक्षिण अफ्रिकाले जवाफमा ९ विकेट गुमाएर ३ सय १२ रनमात्र बनाउन सक्यो । फाइनल आइतबार दुबईमा हुनेछ । भारतले पहिलो सेमिफाइनलमा अस्ट्रेलियालाई ४ विकेटले पराजित गरेको थियो ।

दक्षिण अफ्रिकाका लागि डेविड मिलरले ६७ बलमा सनसनीपूर्ण १०० रन बनाए पनि त्यसले निर्णायक रूप लिन सकेन । उनले ६७ बलमा १० चौका र ४ छक्का प्रहार गरे । त्यसअगाडि ओपनर रायन रिकेल्टसन १७ रनमै आउट भए । अर्का ओपनर तथा कप्तान टेम्बा बाभुमाले ५६ रन जोडे । उनी मिचेल सान्टनरको बलमा आउट भए । उनले रस भान डेर डुसेनसँग दोस्रो विकेटका लागि १ सय ५ रनको सोझदारी गरेका थिए । उनी पनि सान्टनरकै बलमा ६९ रनमा बोल्ड भए ।

उनले ६६ बल खेलेर ४ चौका र २ छक्का प्रहार गरे । त्यसपछि दक्षिण अफ्रिका खुलेर रन बनाउन सकेन । नियमित अन्तरमा विकेट पनि गुमाउँदै गयो । सुरुमा ब्याटबाट राम्रो प्रदर्शन गरेको न्युजिल्यान्डको बलिङ आक्रमण पनि अनुशासित रह्यो । दक्षिण अफ्रिकालाई सस्तोमा समेट्न सान्टनरको प्रदर्शन निर्णायक देखियो । एडेन मारक्रमले २९ बलमा ३१ रनको योगदान दिए । दक्षिण अफ्रिका भने फेरि एकपल्ट ठूलो प्रतियोगितामा निर्णायक मोडमा अपेक्षित प्रदर्शन गर्न असफल रह्यो ।

त्यसअघि रचिन रवीन्द्र र केन विलियम्सनको उत्कृष्ट शतक मदतमा न्युजिल्यान्डले ६ विकेट गुमाई ३ सय ६२ रनको स्कोर खडा गरेको थियो । यो प्रतियोगिताकै इतिहासमा अहिलेसम्मको उच्च स्कोर पनि रह्यो । रवीन्द्रले १ सय १ बलमा १ सय ८ रन बनाए । विलियम्सनले भने ९४ बलमा १ सय २ रन जोडे । न्युजिल्यान्डले टस जितेर ब्याटरलाई मदत गरिरहेको पिचमा पहिले ब्याटिङको निर्णय गरेको थियो । यो निर्णय पनि सही साबित भयो ।