विराटनगर — विभागीय टिम सशस्त्र प्रहरी बल (एपीएफ) ९ औं संस्करणको विराट गोल्ड कपको क्वाटर फाइनलमा प्रवेश गरेको छ । सहिद रंगशालामा मंगलबार पाहुना टोली दिल्ली फुटबल क्लबलाई टाई बेकरमा ५–३ गोलले पराजित गर्दै एपीएफले अन्तिम आठमा स्थान सुरक्षित गरेको हो । 

निर्धारित समयसम्म गोलरहित खेल बराबरी भएपछि टाई ब्रेकरवाट खेलको निर्णय भएको थियो ।  टाई ब्रेकरमा एपीएफका सुमन श्रेष्ठ, दीपेश धिमाल, मणि कुमार लामा, सविन गुरुङ र अनिल श्रेष्ठले गोल गरे । दिल्लीका राहिफ, पिसी र उदितले मात्र गोल गर्न सफल भए भने रमेशको प्रहार एपीएफका गोलरक्षक एन्जल श्रेष्ठले उत्कृष्ट उत्कृष्ट बचाउ गरे । 

खेलको पहिलो हाफमा दबाबमा रहेको एपीएफले दोस्रो हाफदेखि आक्रामक प्रदर्शन गरेको थियो ।  खेलको ३० औं मिनेटमा एपीएफका हरि कार्कीले मध्य भागबाट बल लिएर डिबक्सभित्र प्रहार गरेका थिए तर बल बाहिरिएको थियो । त्यसपछि मणि कुमार लामाले सुन्दर अवसर पाए । तर, गोल गर्न चुके । ३७ औं मिनेटमा हरि कार्कीले डिबक्सभित्रबाट गरेको प्रहार फस्ट बारबाट वाहिरियो ।