चितवन — गोर्खाली रग्बी क्लबले प्रथम गोर्खाली रग्बी सेभेन्सको उपाधि जितेको छ । भरतपुरस्थित कृष्णपुर खेल मैदानमा सम्पन्न प्रतिस्पर्धात्मक फाइनलमा गोर्खाली रग्बीले त्रिभुवन आर्मी क्लबलाई १२–७ स्कोरले पराजित गरेको थियो ।

निर्धारित समय ७–७ स्कोरले बराबरी भएको थियो । त्यसपछि थप समयमा गोर्खालीले गोल्डेन स्कोर गर्दै च्याम्पियन बनेको हो । गोर्खालीका कप्तान यदु अधिकारीले गोल्डन स्कोर गरे ।

जितसँगै विजेता टोलीले २ लाख रुपैयाँ जितेको छ । नेपाली रग्बी खेलको इतिहासमा यो सर्वाधिक राशी हो । उपविजेता आर्मी क्लबले १ लाख रुपैयाँ पायो । गोर्खाली रग्बीका भारतीय खेलाडी जावेद हुसेन उत्कृष्ट खेलाडी भए ।

यसअघि शनिबारै सेमिफाइननलमा आर्मीले कर्णाली प्रदेशलाई १७–१२ स्कोरले हराएको थियो । निर्धारित समय १२–१२ स्कोरमा बराबरी भयो । खेलको अन्तिम समयमा कर्णालीले एउटा सहज कन्भर्जनमा पाएको २ स्कोर गर्न चुक्दा टोलीको फाइनल पुग्ने अवसर गुमायो । त्यसपछि थप समयमा आर्मीले गोल्डन स्कोर गर्दै फाइनलमा स्थान बनाएको हो ।