शनिबार भएको दोस्रो सेमिफाइनलमा आयोजक केपी ओली एफसीलाई मछिन्द्रले ४–० ले हरायो
काठमाडौँ — दशरथ रंगशालामा शनिबार भएको केपी ओली कपको दोस्रो सेमिफाइनलमा दुईपल्टको डिफेन्डिङ च्याम्पियन मछिन्द्रले आयोजक केपी ओली एफसीलाई ४–० ले हराएको छ । यससँगै मछिन्द्रले लगातार तेस्रोपल्ट केपी ओली कपको फाइनल खेल्ने भएको छ ।
खेलको पहिलो गोल मनीष डाँगीले गरे । सनिश श्रेष्ठले ३९ औं मिनेटमा निकालेको पासमा अनमार्क रहेका मनीषले सजिलै गोल गरे । दोस्रो गोल भने रोशन रानाको नाममा रह्यो ।
यसपछिका दुई गोल स्टेफेन जलीको नाममा रह्यो । त्यसमध्ये ८५ औं मिनेटमा उनले पेनाल्टीबाट गोल गरे । खेमराज श्रेष्ठले युसुफलाई लडाएपछि मछिन्द्रले पेनाल्टी पाएको हो । उनको दोस्रो गोल भने ९० औं मिनेटमा सम्भव भएको थियो ।
उपाधिका लागि मछिन्द्रले आर्मीको सामना गर्नेछ । फाइनल सोमबार दशरथ रंगशालामा हुनेछ र त्यसमा मछिन्द्रसामु उपाधिको ह्याट्रिक गर्ने दुर्लभ अवसर हुनेछ ।
