चितवन — प्रथम गोर्खाली रग्बी सेभेन्स प्रतियोगितामा आयोजक गोर्खाली रग्बी क्लब, त्रिभुवन आर्मी क्लब, कर्णाली प्रदेश र एपीएफ क्लब सेमिफाइनल पुगेका छन् ।

भरतपुरस्थित कृष्णपुर खेल मैदानमा शुक्रबार लिग चरणको खेलपछि लुम्बिनी, मधश र गण्डकी प्रदेश टिम बाहिरिए । कुल सात टोलीबीच दुई समूहमा विभाजन गरी खेलाइएको प्रतियोगितामा समूह ए बाट आयोजक गोर्खाली र कर्णाली प्रदेश सेमिफाइनल पुगे । आयोजकले लिगको दुवै खेल जितेर समूह विजेता बन्यो । गोर्खालीले गण्डकी प्रदेशलाई २२–० ले र कर्णाली प्रदेशलाई २२–७ स्कोरले हरायो । कर्णालीले भने गण्डकी प्रदेशलाई २६–५ स्कोरले पराजित गरेको थियो ।

समूह बी बाट त्रिभुवन आर्मी लिगका तीनै खेल जित्दै समूह विजेता बन्यो । टोलीले एपीएफलाई ३४– ५ ले, लुम्विनी प्रदेशलाई ४३–० ले र मधेश प्रदेशलाई ४३–० स्कोरले पराजित गरेको थियो । समूह उपविजेता बनेको एपीएफले भने मधेश प्रदेशलाई २४–५ ले र लुम्बिनी प्रदेशलाई ४५–० ले हराएको थियो ।