बुटवल — पोखराका प्रदीप खड्का रुपन्देहीको बुटवलमा सञ्चालन भएको तेस्रो मेयर कप तथा बुटवल खुल्ला लन टेनिस प्रतियोगिता अन्तर्गत पुरुष एकल स्पर्धामा शुक्रबार च्याम्पियन बनेका छन् । बुटवल ओपनको सुरुवातदेखि सहभागी हुँदै आएका खड्का लगातार तेस्रोपटक च्याम्पियन बनेका हुन् ।

यहाँस्थित लन टेनिस भिलेजमा शुक्रबार दिउँसो भएको फाइनलमा बुटवलका रितिक रानालाई खड्काले ट्राईबेकरमा पराजित गरेका थिए । पहिलो सेटमा पराजित भएका खड्काले उत्कृष्ट पुनरागमन प्रदर्शन गर्दै उपाधि जितेका हुन् । गतवर्ष सञ्चालन भएको पुरुष एकल स्पर्धामा पनि खड्काले रितिकलाई नै पराजित गरेका थिए । गत वर्षको तुलनामा सुरुवातदेखि सुधारिएको खेल प्रदर्शन गरेका रितिकले दोस्रो सेटमा कायम गरेको अग्रता जोगाउन नसक्दा पराजय बेहोर्नु पर्‍यो । प्रदर्शनमा सुधार देखिएको भन्दै खड्काले खेल सम्पन्न भएपछि रितिकको प्रशंसा गरेका थिए ।

‘रितिक र म चिरपरिचित प्रतिद्वन्द्वी हौं,’ खडकाले सञ्चारकर्मीसिति भने, ‘यसपटक मैले उत्कृष्ट पुनरागमन गर्न सफल भएपछि रितिकले खेल गुमाए ।’ च्याम्पियन बनेपछि खडकाले उपाधिसँगै नगद ६० हजार, कप, मेडल, प्रमाणपत्र प्राप्त गरे । आयोजक रुपन्देही लन टेनिस संघका अनुसार प्रतियोगिताको पहिले संस्करणमा प्रणव खनाल विजेता थिए । दोस्रो संस्करणमा खड्का च्याम्पियन बनेका थिए । त्यसपछि तेस्रो र चौथो संस्करणमा रितिकले बाजी मारेका थिए । त्यसपछिका तीनवटा संस्करणमा खडका च्याम्प्यिन बनेका हुन् । लगातार जीतपछि खडकाले बुटवललाई आफ्नो ‘दोस्रो घर’ बताउँदै यहाँका समर्थकको मायाले प्रदर्शनमा सघाउने गरेको बताए । 

फाइनलमा रितिकले ६–३ अंकसहित पहिलो सेटमा जित निकालेका थिए । दोस्रो सेट भने ७–६ ले प्रदिपले आफनो पक्षमा पारे । निर्णायक सेटमा प्रदिपले कम ब्याक गर्दै ६–१ को अंकले जित निकालेर च्याम्पियन बनेका थिए । यो आफ्नो खेल जीवनको १५ औं उपाधि भएको खड्काले बताए । ‘मेरो जीवनको पहिलो टाइटल बुटवल ओपनमै जितेको थिएँ,’ उनले भने, ‘१५ औं पटक पनि यहीँ च्याम्पियन हुन पाउँदा खुसी छु ।’ र्‍याकेट चेन्ज गर्दा शुक्रबार पहिलो सेटमा समस्या भएको उनले बताए ।