पोखरा — मछिन्द्र फुटबल क्लबलाई टाइब्रेकरमा ४–२ ले हराउँदै थ्रीस्टार क्लब पोखरामा जारी २४ औं आहा–रारा पोखरा गोल्डकप फुटबलको सेमिफाइनल पुगेको छ । पाँचपल्टको उपाधि विजेता एवं साबिक उपविजेता थ्रीस्टारले आइतबार क्वाटरफाइनलमा मछिन्द्रलाई हराउँदा गोलरक्षक सरिन जीसी नायक बने ।

प्रशिक्षक गणेश खड्काले उनलाई खेलको अन्तिम समयमा अभिषेक बराललाई प्रतिस्थापन गर्दै मैदान प्रवेश गराएका थिए । उनको त्यही निर्णयले थ्रीस्टारलाई सेमिफाइनल पुर्‍याउन मद्दत गर्‍यो । 

निर्धारित ९० र अतिरिक्त ३० मिनेट गोलरहित बराबरीमा टुंगिएपछि खेल टाइब्रेकरमा पुगेको थियो । थ्रीस्टारका तर्फबाट दीपेश घले, फोफाना, विराज महर्जन र लक्ष्मण रुचालले गोल गरे । मछिन्द्रका विशाल घलानको प्रहार बारमा लागेर फर्कियो । अर्का खेलाडी आदित्य शाक्यको पेनाल्टी थ्रीस्टारका युवा गोलरक्षक सरिन जीसीले बचाए । मछिन्द्रका तर्फबाट दिवाकर चौधरी र सनिश श्रेष्ठले गोल गरे । थ्रीस्टारका दीपेश घले प्लेयर अफ द म्याच भए । 

अनुभवी खेलाडीले भरिएको थ्रीस्टार र राष्ट्रिय टिममा खेलेको अनुभव लिइसकेका झन्डै आधा दर्जन खेलाडी रहेको मछिन्द्रबीचको भिडन्त प्रतिस्पर्धात्मक हुने ठानिएको थियो । फलस्वरुप १ सय २० मिनेटसम्म गोल गर्ने दुवैको प्रयास विफल भयो ।

दुवैले पाएका अवसर सदुपयोग गर्न सकेनन् । खेलको दोस्रो मिनेटका थ्रीस्टारका डिफेन्डरले क्लियर नगरेको बल मछिन्द्रका मनीष डाँगीले प्रहार गरे पनि पोस्टलक्षित बन्न सकेन । खेलको १२ औं मिनेटमा मछिन्द्रले अग्रता लिने अर्को अवसर गुमायो । स्टेफेन कामाहाले बक्समा पुर्‍याएको बल नियन्त्रण गर्न नसक्दा गोल गर्न चुके । 

खेलको १९ औं मिनेटमा थ्रीस्टार अग्रता लिनबाट चुक्यो । दीपेश घलेले दायाँ भागबाट गरेको प्रहार बारमा लागेर फर्कियो । कमल श्रेष्ठले कर्नरबाट गरेको २४ औं मिनेटको प्रहार मछिन्द्रका गोलरक्षक विशाल श्रेष्ठले बचाए । खेलको ७८ औं मिनेटमा मछिन्द्रका सनिश श्रेष्ठको फ्रिकिक थ्रीस्टारका खेलाडीले क्लियर गरिदिए ।

तर, कर्नर बनेको उक्त मुभमा सनिशले प्रहार गरेको बल सौरभ लिम्बूले पोस्टको दिशा दिन सकेनन् । थ्रीस्टारका फोडे फोफानाले इन्ज्युरी समय गरेको प्रहार पोस्टमा लागेर फर्किंयो । थ्रीस्टारका कलम श्रेष्ठलाई १ सय १६ औं मिनेटमा प्रतिस्थापन गर्दै अनुभवी खेलाडी विराज महर्जन मैदान प्रवेश गरे । अतिरिक्त समयको इन्ज्युरी समयमा प्रशिक्षकले गोलरक्षक पनि परिवर्तन गरे । 

मछिन्द्रले प्रि–क्वाटरफाइनलमा एपीएफलाई हराएर आएको थियो भने थ्रीस्टारले सिधैं क्वाटरफाइनल प्रवेश पाएको थियो । थ्रीस्टारले यसअघि ०६३, ०६७, ०६९, ०७१ र ०७५ मा उपाधि जितेको थियो । थ्रीस्टार गत वर्ष त्रिभुवन आर्मीसँग ३–० ले फाइनलमा पराजित भएको थियो ।