हेटौंडा — वाग्मती गाउँपालिका खेलकुद विकास समितिले आयोजना गर्ने सातौँ संस्करणको वाग्मती गोल्डकप राष्ट्रिय फुटबल प्रतियोगिता आगामी फागुन ३ गतेदेखि सुरु हुने भएको छ । यसअघि खेलकुद विकास समितिले फागुन १ गतेदेखि खेल सञ्चालन गर्ने पत्रकार सम्मेलनमार्फत जानकारी दिएको थियो ।

अखिल नेपाल फुटबल संघको माघ ७ गतेको पत्रानुसार वाग्मती गोल्डकप फागुन ३ गतेदेखि सुरु गर्न लागेको वाग्मती गाउँपालिका खेलकुद विकास समितिका अध्यक्ष रहरसिंह थिङले जानकारी दिए ।

'प्रतियोगिता फागुन ३ गतेदेखि सुरु भएर फागुन १३ गते सम्पन्न हुने छ,' उनले भने । तयारी नपुगेकाले खेलकुद  विकास समितिको अनुरोधमा अखिल नेपाल फुटबल संघले फुटबल प्रतियोगिताको मिति संशोधन गरिदिएको हो । प्रतियोगिता वाग्मती गाउँपालिका-४ झुरझुरेस्थित पालिकाको लगानीमा निर्मित सहिद स्मृति रंगशालामा हुनेछ ।

यसअघिका संस्करण जनता मावि फापरबारीको खेल मैदानमा हुँदै आएको थियो । प्रतियोगितामा प्रथम टिमले  १० लाख र दोस्रो हुने टिमले ५ लाख रुपैयाँसहित शिल्ड, मेडल र प्रमाणपत्र प्राप्त गर्ने वाग्मती गाउँपालिका खेलकुद विकास समितिका अध्यक्ष  थिङले जानकारी दिए ।

प्रतियोगितामा ए डिभिजनका ७, मोफसलका ३ सहित १० टिमको सहभागिता रहने बताइएको छ । प्रतियोगिता सञ्चालनको लागि ७४ लाख ७३ हजार रुपैयाँ खर्च हुने आयोजकको अनुमान छ ।